मेडिकल अफिसरहरूबाट दोस्रो चरणको आन्दोलन घोषणा

देश

गृहपृष्ठ
देश

मेडिकल अफिसरहरूबाट दोस्रो चरणको आन्दोलन घोषणा

ह्याप्पी टाइम्स आइतबार, माघ ११, २०७७

धरानस्थित बीपी कोइराला स्वास्थ्य विज्ञान प्रतिष्ठानका मेडिकल अफिसरहरूले दोस्रो चरणको आन्दोलन घोषणा गरेका छन् । सरकारले तोकेको मापदण्डअनुसार आठौं तहको तलब सुविधा र कोभिड जोखिम भत्ता पाउनुपर्ने माग पूरा गर्न व्यवस्थापन पक्ष सहमत नभएपछि उनीहरूले बुधबारदेखि थप आन्दोलन गर्ने घोषणा गरेका हुन् । जोखिम भत्ता नपाएको भन्दै आन्दोलनमा उत्रिएका धरानको बीपी कोइराला स्वास्थ्य विज्ञान प्रतिष्ठानका स्वास्थ्यकर्मी ड्युटी छाडेर आन्दोलनरत मेडिकल अफिसर (हाउस अफिसर) र प्रतिष्ठानको व्यवस्थापन पक्षबीच मंगलबार भएको वार्ता बिनानिष्कर्ष टुंगिएको छ । बिहानदेखि दुई चरणमा वार्ता भए पनि सहमति नजुटेको आन्दोलनरत डा. ममता मण्डलले बताइन् । उनका अनुसार प्रतिष्ठानको व्यवस्थापन पक्षले आफूहरूको माग सम्बोधन गर्न एक कार्यदल बनाउने र त्यसले तयार पारेको प्रतिवेदन आउँदो सिनेट बैठकमा पास गर्ने मौखिक आश्वासन मात्र दिएकाले वार्ता बिनानिष्कर्ष टुंगिएको हो । वार्ता भंग भएपछि प्रतिष्ठानको कोभिड अस्पतालदेखि बहिरंग सेवा, आकस्मिक तथा अन्य विभिन्न कक्षमा कार्यरत सबै मेडिकल अफिसरहरूले काम छाड्ने भएका छन् । प्रतिष्ठानमा कार्यरत मेडिकल अफिसरहरूले लामो समयदेखि आन्दोलन गरिराखे पनि माग पूरा गराउन प्रतिष्ठान सकारात्मक देखिएको छैन । ‘सात महिनाअघि पनि यसै विषयमा आन्दोलन हुँदा व्यवस्थापनले सिनेटमा लैजाने भनेर हस्ताक्षर गरेको पत्र दिएका थिए । तर त्यसपछि बसेको ४२ औं सिनेट बैठकमा एजेन्डा नै नराखेपछि फेरि आन्दोलित हुनुपरेको हो,’ डा. मण्डलले बताइन् । प्रतिष्ठानमा ३५ जना मेडिकल अफिसर कार्यरत छन् । आन्दोलित चिकित्सकहरूले प्रतिष्ठानले आफूहरूलाई सरकारी स्केल भन्दै ३४ हजार ५ सय रुपैयाँ मात्रै मासिक तलब दिँदै आएको गुनासो गरे । तर महाराजगन्जस्थित शिक्षण अस्पताल, पाटन स्वास्थ्य विज्ञान प्रतिष्ठान, धुलिखेल अस्पतालगायतले ५५ हजारदेखि ६० हजार रुपैयाँसम्म तलब दिने गरेको उनीहरूको भनाइ छ । यसैबीच, कोभिड जोखिम भत्ता नदिएको भन्दै अग्रपंक्तिमा खटिएका जुनियर वेलफेयर सोसाइटीमा आबद्ध प्रतिष्ठानका ३ सय चिकित्सकहरूले समेत आन्दोलन जारी रहेको जनाएका छन् । सोसाइटीका उपाध्यक्ष डा. पदम नेपालीले मेडिकल अफिसरहरूलाई वार्तामा बोलाए पनि आफूहरूलाई प्रतिष्ठानले वार्तामा समेत नबोलाएको गुनासो गरे । सरकारले कोभिड जोखिम भत्ताबापतको बजेट निकासा गरिसके पनि प्रतिष्ठानले नदिएपछि गत माघ १ देखि कोभिड अस्पतालको समेत सेवा बहिष्कार गर्दै आन्दोलनमा उत्रनुपरेको उनको भनाइ छ । ‘प्रतिष्ठानले १० महिना बितिसक्दा पनि स्वास्थ्यकर्मीलाई जोखिम भत्ता दिएको छैन । कोरोना उपचारमा खट्ने स्वास्थ्यकर्मीलाई जोखिम भत्ता नदिएसम्म काममा नफर्किने र प्रतिष्ठानको कोभिड अस्पतालमा नजाने निर्णय गरेका छौं,’ उनले भने ।

प्रकाशित मिति: आइतबार, माघ ११, २०७७ १६:०१