कावासोती
नेपाल रेडक्रस सोसाइटी कावासोती उपशाखाले मर्चरी चेम्बरको शुभारम्भ गरेको छ।
नेपाल रेडक्रस सोसाइटी कावासोती उपशाखाको २३ औं वार्षिक साधारण सभा तथा ८ औं अधिवेशनको अवसरमा सामाजिक सेवामा नयाँ आयाम थप्ने उद्देश्यका साथ २ वटा मर्चरी चेम्बरको स्थापना तथा शुभारम्भ गरिएको उपशाखाका सभापति बाबुराम कँडेलले प्रेस विज्ञप्ति मार्फत जानकारी दिनुभएको छ।
प्रति मर्चरी चेम्बर २ लाख २५ हजारका दरले स्थापना गरिएको उक्त मर्चरीलाई कावासोती नगरपालिका भित्र प्रयोग गरिँदा प्रति दिन १५ सय र अन्य ठाउँको हकमा २ हजारका दरले शुल्क समेत तोकिएको छ।
नेपाल रेडक्रस सोसाइटी कावासोती उपशाखाले नवलपुर जिल्लामा बिभिन्न समयमा रक्तदान कार्यक्रमको आयोजना गर्दै २४ सै घण्टा रक्त उपलब्ध गराउनुका साथै , विद्यालयस्तरीय रक्त समूह परीक्षण कार्यक्रम, स्वास्थ्य शिक्षा तथा विपद् व्यवस्थापन जस्ता कार्यक्रमहरू सञ्चालन गर्दै आइरहेको छ।
उपशाखाले एम्बुलेन्स तथा शव वहान सेवाको समेत व्यवस्थापन गर्दै यस क्षेत्रका समुदायलाई अत्यावश्यक सेवा प्रदान गर्दै आइरहेको अवस्थामा अबका दिनमा मर्चरी चेम्बरको समेत शुभारम्भ गरिएको सभापति कँडेल बताउनुभएको छ।
नेपालभरि रहेका १ हजार ६ सय १५ उपशाखाहरू मध्ये उत्कृष्ट कार्य सम्पादन गर्ने यस कावासोती उपशाखाले समाजसेवा तथा मानवताको सेवामा अतुलनीय योगदान दिँदै रक्तसञ्चार सेवा, उद्धार तथा राहत कार्य, एम्बुलेन्स सेवा, शव वहान सेवा, स्वास्थ्य सचेतना कार्यक्रम तथा विभिन्न सामाजिक सेवाहरू उपलब्ध गराउँदै आएको छ ।
नेपाल रेडक्रस सोसाइटी कावासोती उपशाखाका सभापति कँडेलले विविध कारणले शवलाई केही समयसम्म सुरक्षित राख्नुपर्ने अवस्था आएको खण्डमा उक्त शवलाई व्यवस्थित रूपमा राख्न सक्ने मर्चरी चेम्बरको स्थापना गरि शुभारम्भ गरिएको जानकारी दिनुभएको हो।
