कावासोती
नेपाल शिक्षक महासंघ जिल्ला कार्यसमिति नवलपुरको पदस्थापन तथा शपथ ग्रहण कार्यक्रम सम्पन्न भएको छ। आइतबार कावासोतीको शिव नमुना माध्यमिक विद्यालयमा एक कार्यक्रमको आयोजना गरी नयाँ कार्यसमितिको पदस्थापन गरिएको हो। नेपाल शिक्षक महासंघका केन्द्रीय सचिव तथा निर्वाचन समितिका संयोजक केशवप्रसाद रेग्मीको अध्यक्षतामा कार्यक्रम सम्पन्न गरिएको हो। कार्यक्रमको प्रमुख अतिथिका रुपमा नेपाल शिक्षक महासंघका केन्द्रीय उपाध्यक्ष रामप्रसाद पोखरेल रहनुभएको थियो। कार्यक्रममा बोल्दै प्रमुख अतिथि पोखरेलले शिक्षकहरूको राजनितिक आस्था भए पनि कुनै पार्टी नहुने भएकाले शिक्षकको हक हितका लागि सबै एकजुट भएर अगाडि बढ्नुको विकल्प नरहेको बताउनुभयो । उहाँले नेपालका हरेक शैक्षिक आन्दोलनमा शिक्षकको जित भएको बताउँदै शिक्षाका विकासको लागि शिक्षा सम्बद्ध व्यक्तित्वहरू संगठित हुनुपर्ने बताउनुभयो । कार्यक्रममा विद्यालय कर्मचारी परिषद् नवलपुरका अध्यक्ष सुरज भुजेल, अखिल नेपाल शिक्षक संगठन गण्डकी प्रदेशका सदस्य रामप्रसाद गौतम, नेपाल राष्ट्रिय शिक्षक संगठन गण्डकी प्रदेशका उपाध्यक्ष बलराम रानाभाट, नेपाल शिक्षक संघ गण्डकी प्रदेशका उपाध्यक्ष विष्णु रिजाल, एकीकृत अखिल नेपाल शिक्षक संगठनका केन्द्रीय उपमहासचिव नारायण अर्याल लगायतले शुभकामना मन्तव्य राख्नुभएको थियो।
कार्यक्रममा नवनिर्वाचित कार्यसमितिलाई निर्वाचन समितिका संयोजक केशव प्रसाद रेग्मीले शपथ ग्रहण गराउनुभएको थियो। नेपाल शिक्षक संघका उपाध्यक्ष राधा तिवारीको स्वागत मन्तव्य रहेको कार्यक्रमको सहजीकरण नेपाल शिक्षक संगठनका जिल्ला अध्यक्ष टिकाराम डुम्रेले गर्नुभएको थियो।
अध्यक्षमा चन्द्रदेव तिवारी पुनः सर्वसम्मत
नेपाल शिक्षक महासंघ नवलपुरको अध्यक्षमा चन्द्रदेव तिवारी पुनः दोस्रो कार्यकालका लागि सर्वसम्मत निर्वाचित हुनुभएको छ। महासंघको सह-अध्यक्षमा कृष्णचन्द्र गिरी, उपाध्यक्षमा हिमालदेव पंगेनी, महिला उपाध्यक्षमा रामकुमारी मर्दनिया, सचिवमा गिरिराज गिरी, सह-सचिवमा चोककबहादुर पाइजा, महिला सह-सचिवमा कोपिला आचार्य, अर्थ सह-सचिवमा हरिबहादुर बिक, संस्थागत सह-सचिवमा जनकराज पोखरेल र दधिराम सापकोटा सर्वसम्मत चयन हुनुभएको छ। यसैगरी महासंघको सदस्यहरूमा अर्जुन पौडेल, धनबहादुर ज्ञवाली, शर्मिला रानाभाट, मनबहादुर रानाभाट, गेसबहादुर राना, राम तिवारी, टंक पौडेल, हरिकला पाण्डे, दीपक अर्याल, चेतमाया गाहा, साधना गाहा, भीमकुमार सिर्पाली, कुलप्रसाद पौडेल, चन्द्रकला कार्की चयन हुनुभएको छ। केन्द्रीय प्रतिनिधिमा भने तिलकमाया गहतराज, पुरुषोत्तम भुर्तेल, सुरेन्द्रराज भट्टराई, बलराम लामिछाने, लीला ढुंगाना अधिकारी र राम बहादुर श्रेष्ठ सर्वसम्मत चयन हुनुभएको छ। नवनिर्वाचित कार्यसमितिले निकट भविष्यमै नेपाल शिक्षक महासंघको स्थानीय समिति गठन गर्ने समेत निर्णय गरेको छ।
