देवचुली
दोस्रो देवचुली वार्ड स्तरीय ब्याडमिन्टन प्रतियोगिता शुक्रबार देखि देवचुली १५ प्रगतिनगरमा सुरु भएको छ। देवचुली १५ प्रगतिनगरमा सुविधासम्पन्न कभर्ड हल निर्माण भए सँगै सो हलको उद्घाटन सँगै प्रतियोगिता आयोजना गरिएको हो।

देवचुली युवा तथा खेलकुद विकास समितिको आयोजना तथा प्रगतिनगर कभर्ड हल निर्माण उपभोक्ता समितिको सह आयोजनामा देवचुली नगरपालिका वडा न १५ र वडा युवा तथा खेलकुद विकास समिति देवचुली १५ को समन्वयमा शुक्रबार देखि प्रतियोगिताको सुरु गरिएको हो।

महिला तथा पुरुष समूह गरि जम्मा ५२ वटा समूहको सहभागिता रहेको वार्ड स्तरीय ब्याडमिन्टन प्रतियोगितामा सिनियर तर्फ क्रमश प्रथम , द्वितीय र तृतीय हुने समुहलाई ६ हजार , ३ हजार र १ हजार , जुनियर तर्फ क्रमश प्रथम , द्वितीय र तृतीय हुने समुहलाई ८ हजार , ४ हजार र १ हजार , भेट्रान्स तर्फ क्रमश प्रथम , द्वितीय र तृतीय हुने समुहलाई ७ हजार , ३ हजार ५ सय र १ हजार साथै महिला तर्फ प्रथम हुने समुहलाई २ हजार र द्वितीय हुने समुहलाई १ हजार पुरस्कार प्रदान गरिने खेल संयोजक आकाश श्रेष्ठले जानकारी दिएका छन्।
देवचुली युवा तथा खेलकुद विकास समितिका सचिव प्रकाश काफ्लेले सहजीकरण गरेको कार्यक्रममा अध्यक्ष दीपक भट्टराईको अध्यक्षता सँगै देवचुली १५ का वडा अध्यक्ष सुरेश कुमार रानाभाटको प्रमुख आतिथ्यता रहेको थियो।

प्रगतिनगर कभर्ड हल निर्माण उपभोक्ता समितिका अध्यक्ष जीवन श्रेष्ठको स्वागत मन्तव्य रहेको कार्यक्रममा रेफ्री देव बहादुर थापा लगायतका अतिथिहरूले शुभकामना मन्तव्य राखेका थिए। सोहि क्रममा प्रमुख अतिथि समेत रहेका देवचुली १५ का वडा अध्यक्ष रानाभाटले नगर भित्र रहेका खेलाडीहरूलाई खेलको लागी सहज वातावरण हुने र यस क्षेत्रबाट खेलाडी उत्पादनमा सघाउन पुग्ने गरि कभर्ड हल निर्माण गरिएकोमा खुसि लागेको बताउँदै आगामी दिनमा वडाले आवश्यक परेको अवस्थामा हरदम सहयोग गर्ने बताएका थिए।

देवचुली नगरपालिका बाट ४ लाख ८४ हजार ८ सय ७८ र देवचुली नगरपालिका वडा न १५ बाट ३ लाख ८३ हजार ६ सय ३० सहित अन्य स्थानिय दाताहरुबाट संकलित गरि साढे १५ लाख लागतमा उक्त कभर्ड हल निर्माण गरिएको हो।
