देवचुली खानेपानी तथा सरसफाइ उपभोक्ता संस्थाको नयाँ कार्यसमिति चयनका लागि सम्पन्न निर्वाचनमा बलराज बिकको प्यानलले अध्यक्षसहित महत्त्वपूर्ण पदहरूमा शानदार जीत हासिल गरेको छ। शनिबार भएको मतदानमा बिकले निकटतम प्रतिस्पर्धी ढकलाल काफ्लेलाई ८६ मतले पराजित गर्दै अध्यक्ष पदमा निर्वाचित भएका हुन्। बिकले ३६९ मत प्राप्त गर्दा काफ्लेले २८३ मत ल्याए भने अर्को उम्मेदवार कृष्णबहादुर क्षेत्रीले १५३ मत प्राप्त गरे।
नयाँ नेतृत्व चयनसँगै उपाध्यक्ष, सचिव, कोषाध्यक्ष, लेखा सदस्यहरू पनि बिककै प्यानलबाट निर्वाचित भएका छन्। उपाध्यक्षमा नन्दकला केसी, सचिवमा यमप्रसाद भुसाल, कोषाध्यक्षमा शेरबहादुर राना विजयी भएका छन्। लेखा सदस्य खुल्लातर्फ अनिता कामी र लेखा महिला सदस्यमा चन्द्रमाया बाचे निर्वाचित भए।
निर्वाचनमा विभिन्न टोलका प्रतिनिधिहरू पनि चयन भएका छन्। बिकको प्यानलबाट तिनकन्या टोलबाट बिर्खमाया लुंगेली, फुलबारी टोलबाट बुद्धिमाया थापा, कालिका टोलबाट गंगाबहादुर भट्टराई, हरियाली टोलबाट तारा खनाल, सिद्धी विनायक टोलबाट लालबहादुर बाचे मगर, भीमसेन टोलबाट दिलबहादुर तामाङ विजयी भएका छन्। यस्तै, काफ्ले प्यानलबाट मिलन टोलबाट शर्मिला तामाङ, लालीगुरास टोलबाट कमला खरेल, प्रगति टोलबाट आश पुरे कामी निर्वाचित भएका छन्।
संस्थाको लेखा समिति संयोजकमा भीमबहादुर श्रेष्ठ निर्विरोध निर्वाचित भए। निर्वाचनमा कुल १२५६ मतदाता रहेकोमा ८५९ मत खसेको निर्वाचन समिति संयोजक जिवलाल श्रेष्ठले जानकारी दिए।
नयाँ नेतृत्व चयनसँगै देवचुली खानेपानी तथा सरसफाइ उपभोक्ता संस्थाले स्थानीय उपभोक्ताहरूको आवश्यकतामा अझ प्रभावकारी रूपमा काम गर्ने अपेक्षा गरिएको छ।
