नवलपुरको प्रगतिनगरमा रहेको जनज्योति आदर्श बहुमुखी क्याम्पसको १८औ वार्षिकोत्सव सम्पन्न भएको छ। शनिबार क्याम्पसले क्याम्पस प्राङ्गणमा एक कार्यक्रमको आयोजना गरी १८औ वार्षिकोत्सव, अभिभावक दिवस तथा क्याम्पस सभा सम्पन्न गरेको हो। कार्यक्रमको अध्यक्षता क्याम्पस सञ्चालक समितिका अध्यक्ष होमनाथ जैसीले गर्नुभएको थियो। कार्यक्रममा प्रमुख अतिथिका रुपमा नवलपुर क्षेत्र नम्बर १ का संघीय सांसद प्रा. डा. शशांक कोइराला रहनुभएको थियो। कार्यक्रममा शुभेच्छाका मन्तव्य राख्नुहुँदै प्रमुख अतिथि कोइरालाले शिक्षाको विकासका लागि आफ्ना अग्रजहरुले गरेको योगदानको स्मरण गर्दै जनज्योति आदर्श बहुमुखी क्याम्पसको सर्वाङ्गीण विकासका लागि आँफू गम्भीर रहेको बताउनुभयो। उहाँले क्याम्पसको जग्गा प्राप्ति, इ-लाइब्रेरी र अधुरो भवनलाई पूर्णता दिनका लागि आफ्नो ध्यान आकर्षण भएको बताउनुभयो। कार्यक्रममा क्याम्पस चिफ जयनारायण सापकोटाले क्याम्पसको प्रगति प्रतिवेदन वाचन गरेर सुनाउनुभएको थियो।
वार्षिकोत्सव कार्यक्रममा गण्डकी प्रदेशका पूर्व प्रदेश सभा सदस्य ओमकला गौतम, जिल्ला समन्वय समिति नवलपुरका प्रमुख बाबुराम विश्वकर्मा, शिक्षा विकास तथा समन्वय इकाई नवलपुरका प्रमुख दिपेन्द्रराज श्रेष्ठ, देवचुली नगरपालिका वडा नम्बर १५ का वडाध्यक्ष सुरेश कुमार रानाभाट, लुम्बिनी आदर्श डिग्री कलेजका क्याम्पस चिफ बाबुराम राना, नेपाल नमुना माध्यमिक विद्यालयका प्रधानाध्यापक शिवप्रसाद देवकोटा, जनज्योति माध्यमिक विद्यालयका विद्यालय व्यवस्थापन समितिका अध्यक्ष बद्रीप्रसाद बस्याल र प्रगतिनगर खानेपानी तथा सरसफाई उपभोक्ता संस्थाका अध्यक्ष खिमानन्द भुसाल लगायतले शुभकामना मन्तव्य राख्नुभएको थियो।
कार्यक्रममा जनज्योति आदर्श बहुमुखी क्याम्पसका संस्थापक अध्यक्ष प्रा. डा. मोहनीलाल भुसाल, उपाध्यक्ष विष्णुप्रसाद बास्तोला, संस्थापक क्याम्पस चिफ जीवनराज अधिकारी लगायत १० वर्ष सेवा अवधि पूरा गर्नुभएका प्राध्यापकहरू, पूर्व अध्यक्षहरु र पूर्व क्याम्पस चिफहरुलाई सम्मान गरिएको थियो।
क्याम्पस सञ्चालक समितिका सदस्य सरस्वती तिमिल्सिनाले धन्यवाद ज्ञापन गर्नुभएको कार्यक्रममा क्याम्पसका सञ्चालक समितिका उपाध्यक्ष ठाकुर शर्माले समितिका तर्फबाट र विद्यार्थी मनिषा कंडेलले विद्यार्थीका तर्फबाट स्वागत मन्तव्य राख्नुभएको थियो। कार्यक्रमको सहजीकरण क्याम्पसका सहायक प्राध्यापक सोम सुवेदीले गर्नुभएको थियो। १८ औँ वार्षिकोत्सव, अभिभावक दिवस तथा क्याम्पस सभा कार्यक्रममा विभिन्न क्षेत्रका व्यक्तित्वहरू, शिक्षाप्रेमी, अभिभावक, विद्यार्थी लगायत स्थानीयहरूको उपस्थिति रहेको थियो।
