देवचुली
देवचुली नगरपालिकाको गौरवको रुपमा देवचुली उद्योग वाणिज्य सङ्घको आयोजनामा देवचुली १४ छत्तिसघरमा आयोजित पाँचौँ देवचुली महोत्सव भव्य रुपमा सञ्चालन भइरहेको छ।
गत फाल्गुन १२ गते देखि सुरु भएको महोत्सवमा शुक्रबार चर्चित र्यापर आशिष राना “लाहुरे” ले रोडसाइड रोमियो , तारा बाजी लै लै , चुप लाग , ताण्डव जस्ता र्याप गाउँदै उपस्थित दर्शकहरूलाई बार भाचिने गरि नचाएका थिए। साथमा लोक दोहोरी गायिका द्वय अश्मि थापा र उमा देवी खनालले समेत आफ्नो प्रस्तुति राखेका थिए।
देवचुली उद्योग वाणिज्य सङ्घका वाणिज्य उपाध्यक्ष नारायण प्रसाद पौडेलको स्वागत मन्तव्य रहेको आजको कार्यक्रममा सूर्यप्रसाद दवाडीको अध्यक्षता तथा देवचुली वडा न १० का वडा अध्यक्ष रेप्ति कुमार घर्तिको प्रमुख आतिथ्यता रहेको थियो।
महोत्सवका सांस्कृतिक संयोजक तथा सल्लाहकार सत्य नारायण भुसालको सहजिकरणमा देवचुली डान्स आइडलको प्रतियोगिता निरन्तर रुपमा अघि बढिरहेको छ भने शुक्रबार ८ समुहको सहभागितामा रत्यौली प्रतियोगिता भने सम्पन्न भएको छ ।
संघका महासचिव बिनोद सिलवालको सहजीकरण रहेको महोत्सवमा १ सय ५० वटा भन्दा बढी व्यापारिक स्टल, २० वटा कृषि, पर्यटन, शिक्षा, स्वास्थ्य लगायतका प्रर्वद्धनात्मक स्टल, बाल उद्यान, विभिन्न प्रकारका पिङ तथा झुलाहरु , जातीय पहिचान झल्कने घर र सामग्री प्रदर्शनी, औद्योगिक उत्पादनहरूको प्रदर्शनी, ६० भन्दा बढी राष्ट्रिय र स्थानीय कलाकारको सहभागिता हुने साथै १ लाख ५० हजार दर्शक भित्र्याउने र १५ करोडको कारोबार गर्ने लक्ष्य राखिएको छ।
