विश्वज्योति माध्यमिक विद्यालयले वार्षिकोत्सव तथा अभिभावक दिवस सम्पन्न गरेको छ। नवलपुरको प्रगतिनगरमा रहेको विश्वज्योति माध्यमिक विद्यालयले शुक्रबार विद्यालय प्राङ्गणमा एक कार्यक्रमको आयोजना गरी ३१औ वार्षिकोत्सव तथा अभिभावक दिवस सम्पन्न गरेको हो। कार्यक्रमको अध्यक्षता विद्यालय व्यवस्थापन समितिका अध्यक्ष मोतीप्रसाद अर्यालले गर्नुभएको थियो। कार्यक्रममा प्रमुख अतिथिका रुपमा देवचुली नगरपालिकाका नगरप्रमुख हरिप्रसाद न्यौपाने रहनुभएको थियो । आफ्ना शुभेच्छा मन्तव्य राख्नुहुँदै प्रमुख अतिथि न्यौपानेले विश्वज्योति माध्यमिक विद्यालयले निजी क्षेत्रबाट शिक्षामा गरेको लगानीको उच्च प्रशंसा गर्नुभयो। उहाँले विश्वज्योति माध्यमिक विद्यालय देवचुली नगरपालिका भित्र सिकाई शिक्षण संस्थाका रूपमा स्थापित भएको पनि बताउनुभयो। कार्यक्रममा देवचुली नगरपालिकाका बालमैत्री परामर्शदाता खिमानन्द भुसाल, विद्यालयका अभिभावक एवं समाजसेवी रेशमलाल सापकोटा, निजी तथा आवासीय विद्यालय अर्गनाइजेसन (प्याव्सन)का केन्द्रीय उपाध्यक्ष गोपेन्द्र केशरी न्यौपाने, शिक्षा विकास तथा समन्वय इकाई नवलपुरका प्रमुख दिपेन्द्रराज श्रेष्ठ लगायतले शुभकामना मन्तव्य राख्नुहुँदै विश्वज्योति माध्यमिक विद्यालयले समय सापेक्ष व्यावहारिक शिक्षा प्रदान गरेको बताउँदै विद्यालय वर्तमान समयमा विज्ञान प्रविधि र डिजिटाइजेसनको अङ्गीकार गर्दै अघि बढेको टिप्पणी गर्नुभयो।
विद्यालयका विद्यार्थीहरूले तीन दर्जनभन्दा बढी सांस्कृतिक नृत्य, झाँकी, नेवा सेवा समाजको सहकार्यमा नेवार समुदायको लाखेनाच, विभिन्न भेषभुषा र पहिरनमा जातीय नाचका साथमा नृत्य प्रस्तुत गरेको कार्यक्रममा कार्यक्रमको अन्तिमसम्म सहभागी हुने उत्कृष्ट तीनजना अभिभावकहरूलाई पुरस्कृत समेत गरिएको थियो । सो अवसरमा विद्यालयले आयोजना गरेको सि.पि.एस./सि.पि.आर.एस कार्यक्रममा विजेता भएका अभिभावकहरुलाई समेत पुरस्कृत गरिएको थियो।
३१ औँ वार्षिकोत्सव तथा अभिभावक दिवसमा विद्यार्थीहरूले विभिन्न विज्ञानका सामग्रीहरु सहितको विज्ञान प्रदर्शनी, खाना महोत्सव तथा मनोरञ्जनात्मक खेल समेत प्रस्तुत गरेका थिए। सो अवसरमा कार्यक्रमका प्रमुख अतिथि नगर प्रमुख हरिप्रसाद न्यौपानेले विद्यार्थीहरूको प्रतिभा अवलोकन गरी हौसला प्रदान गर्दै जेहेन्दार र मेहनती विद्यार्थीहरूलाई नगरपालिकाले अघि बढाउने बताउनुभयो ।
-1741349509.jpg)
विद्यालयका संस्थापक प्रिन्सिपल विष्णुप्रसाद बास्तोलाले विद्यालयको इतिहास प्रस्तुत गर्दै आगन्तुक पाहुनाहरुलाई स्वागत गर्नुभएको थियो। कार्यक्रमको सहजीकरण विद्यालयका को-अर्डिनेटर डा. चन्दा न्यौपानेले गर्नुभएको थियो। कार्यक्रममा प्याव्सनका जिल्ला अध्यक्ष हरिहर अधिकारी लगायतका पदाधिकारी, प्याव्सन कावासोतीका अध्यक्ष त्रिलोक तिवारी, शिक्षा विकास तथा समन्वय इकाईका परीक्षा शाखा प्रमुख सन्तोषी भण्डारी, समाजसेवी उद्योग बहादुर श्रेष्ठ लगायतको उपस्थिति रहेको थियो।
