देवचुली
देवचुली नगरपालिकाको गौरवको रुपमा देवचुली उद्योग वाणिज्य सङ्घको आयोजनामा देवचुली १४ छत्तिसघरमा आयोजित पाँचौँ देवचुली महोत्सव भव्य रुपमा सञ्चालन भइरहेको छ।
गत फाल्गुन १२ गते देखि सुरु भएको महोत्सवमा बुधबार श्याम राना , गायिका खुश्बु सुनार र तारा थापा तथा जेडिसी डान्स ग्रुप सहित स्थानीय कलाकारहरूको विशेष प्रस्तुति रहेको थियो।
सांस्कृतिक कार्यक्रममा गायिका खुश्बु सुनारले आफ्नो चर्चित गीत झ्यालैमा ऐना छ गित गाउँदै गर्दा लोकप्रिय दोहोरि गायक गायक श्याम रानाले कल धारा पानी , घुम्ती घुम्ती रोड , रेलै सलल , स्याउली बजारको जस्ता गीतहरू गाउँदै दर्शकहरूलाई हसाउँदै नचाएका थिए।
देवचुली उद्योग वाणिज्य सङ्घका सचिव तिला अर्यालको स्वागत मन्तव्य रहेको आजको कार्यक्रममा सूर्यप्रसाद दवाडीको अध्यक्षता तथा देवचुली नगरपालिका वडा न १३ का वडा अध्यक्ष एकदेव पौडेलको प्रमुख आतिथ्यता रहेको थियो।
महोत्सव कै अवसर पारि सुरु भएको देवचुली डान्स आइडल महोत्सवका सांस्कृतिक संयोजक तथा सल्लाहकार सत्य नारायण भुसालको सहजिकरणमा निरन्तर अघि बढिरहेको छ।
सङ्घका महासचिव बिनोद सिलवालको सहजीकरण रहेको महोत्सवमा १ सय ५० वटा भन्दा बढी व्यापारिक स्टल, २० वटा कृषि, पर्यटन, शिक्षा, स्वास्थ्य लगायतका प्रर्वद्धनात्मक स्टल, बाल उद्यान, विभिन्न प्रकारका पिङ तथा झुलाहरु , जातीय पहिचान झल्कने घर र सामग्री प्रदर्शनी, औद्योगिक उत्पादनहरूको प्रदर्शनी, ६० भन्दा बढी राष्ट्रिय र स्थानीय कलाकारको सहभागिता हुने साथै १ लाख ५० हजार दर्शक भित्र्याउने र १५ करोडको कारोबार गर्ने लक्ष्य राखिएको छ।
