देवचुली
देवचुली नगरपालिकाको गौरवको रुपमा आयोजना भएको पाँचौँ देवचुली महोत्सवको दोस्रो दिन भव्य रुपमा सम्पन्न भएको छ। आगामी फाल्गुन २५ गतेसम्म सञ्चालन हुने महोत्सवलाई देवचुली उद्योग वाणिज्य संघले आयोजना गरेको हो।
औपचारिक कार्यक्रम
देवचुली १४ मा सुरु भएको पाँचौँ देवचुली महोत्सवको दोस्रो दिन दर्शकको उल्लेख्य सहभागिता रहेको थियो। देवचुली १४ छतीस घरमा सुरु भएको महोत्सवमा संघका अध्यक्ष सूर्य प्रसाद दवाडीको अध्यक्षता सँगै देवचुली नगरपालिकाका प्रवक्ता तिल प्रसाद काफ्लेको प्रमुख आतिथ्यता रहेको थियो।
सोही अवसरमा आफ्नो मन्तव्य राख्नुहुँदै प्रमुख अतिथि काफ्लेले देवचुली महोत्सव नगरको गौरव रहेको र पालिकाले निजी क्षेत्र सँग सहकार्य गरेको जानकारी दिनुहुँदै यस महोत्सवलाई सफल पार्न सम्पूर्ण नगरवासीलाई आग्रह गर्नुभएको थियो। संघका सचिव तिला देवी अर्यालको स्वागत मन्तव्य रहेको औपचारिक कार्यक्रममा नेपाल उद्योग वाणिज्य संघका पूर्व केन्द्रिय सदस्य तथा लेखनाथ उद्योग वाणिज्य संघका पूर्व अध्यक्ष बाबुराम गिरिले शुभकामना मन्तव्य राख्नुभएको थियो भने देवचुली उद्योग वाणिज्य संघका महासचिव बिनोद सिलवालले सहजीकरण गर्नुभएको थियो ।
पाँचौँ देवचुली महोत्सव अघिल्ला महोत्सवहरू भन्दा भन्दा केही पृथक हुने र यस महोत्सवमा १५० वटा भन्दा बढी व्यापारिक स्टल, २० वटा कृषि, पर्यटन, शिक्षा, स्वास्थ्य लगायतका प्रर्वद्धनात्मक स्टल, बाल उद्यान, विभिन्न प्रकारका पिङ तथा झुलाहरु , जातीय पहिचान झल्कने घर र सामग्री प्रदर्शनी, औद्योगिक उत्पादनहरूको प्रदर्शनी, ६० भन्दा बढी राष्ट्रिय र स्थानीय कलाकारको सहभागिता हुने साथै १ लाख ५० हजार दर्शक भित्र्याउने र १५ करोडको कारोबार गर्ने लक्ष्य राखिएको देवचुली उद्योग वाणिज्य संघका अध्यक्ष सुर्य प्रसाद दवाडीले बताउनुभएको छ।
सांस्कृतिक कार्यक्रम ( अनौपचारिक )
पाँचौँ देवचुली महोत्सवको दोस्रो दिन लोक दोहोरी गायिका जानु माया गुरुङ , लोक दोहोरी गायक धादिङे भाले नवराज काप्री , गायक बसन्त लम्साल तथा सुमन रोकाको साथमा स्थानीय कलाकारहरूको गायन तथा नृत्य प्रस्तुति रहेको थियो।
माधव जोन खत्रीको सहजीकरण रहेको अनौपचारिक कार्यक्रममा आज मङ्गलबारदेखि देवचुली डान्स आइडल सुरु भएको महोत्सवका सांस्कृतिक संयोजक सत्यनारायण भुसालले जानकारी दिनुभएको छ।
फाल्गुन १४ को विशेष आकर्षण
चर्चित लोक दोहोरी गायक रमेशराज भट्टराई फाल्गुन १४ को विशेष आकर्षणको रुपमा रहनुहुने भएको छ। महोत्सवमा उपस्थित हुने दर्शकहरूलाई नचाउनको लागी बिनिता घर्ती मगर , लोक पप गायक रवि रिमाल लगायतका कलाकारहरूको प्रस्तुति रहनेछ।
चर्चित लोक दोहोरी गायक रमेशराज भट्टराईको बहुला , बबाल भो , फिदा सहित दर्जनौँ गीतहरू चर्चित छन्। भट्टराईले गायक पशुपति शर्मा सँग सहकार्य गरेर प्राकृतिक चिकित्सालय सम्बन्धि गित समेत गाएका छन्।
