देवचुली
देवचुली नगरका १ सय २० भन्दा बढी संघसंस्थाहरूको शोभायात्रासहितको उपस्थितिमा पाँचौं देवचुली महोत्सवको भव्य रुपमा समुद्घाटन गरिएको छ । देवचुली उद्योग वाणिज्य संघको परिसरमा नगरभित्रका आमा समूह, टोल सुधार समिति, युवा क्लब, विद्यालय, सामुदायिक वन, खानेपानी संस्था, सहकारी संस्था, भजन समूह, लगायत विभिन्न संघ संस्थाको ब्यानर सहित झाँकी र सांस्कृतिक एवं जातजातिहरूको पोशाकले सजिएको शोभायात्रा दलदले बजार हुँदै देवचुली १४ महोत्सव स्थलमा पुगेको थियो।


देवचुली १४ का ज्येष्ठ नागरिक चन्द्रकला उपाध्यायसहित नगरप्रमुख हरिप्रसाद न्यौपाने उद्योग वाणिज्य संघको परिसरबाट रथमा सवार भई महोत्सव स्थल पुग्नुभएको थियो। देवचुली नगरबासीहरुको भव्य सहभागितामा नगरप्रमुख न्यौपानेले पाँचौं देवचुली महोत्सवको समुद्घाटन गर्नुभयो। देवचुली उद्योग वाणिज्य सङ्घका अध्यक्ष सूर्यप्रसाद दवाडीको अध्यक्षता तथा नगर प्रमुख हरिप्रसाद न्यौपानेको प्रमुख आतिथ्यमा महोत्सवको सुरुवात गरिएको हो। महोत्सवमा प्रमुख अतिथिको भनाइ राख्नुहुँदै नगरप्रमुख न्यौपानेले देवचुली नगरपालिका भित्रका कृषि, पर्यटन, उद्योग, व्यवसाय, लगायत समग्र क्षेत्रको विकासका लागि नगरपालिका अग्रसर रहेको बताउनुभयो। उहाँले देवचुली नगरपालिकाको विकासमा नगरपालिकाले निजी क्षेत्रसँग सधैँ हातेमालो गर्दै अगाडि बढिरहेको बताउनुभयो ।

समुद्घाटन कार्यक्रममा विद्यालय तथा संघसंस्थाको तर्फबाट नेपाल नमुना माध्यमिक विद्यालयका प्रधानाध्यापक शिवप्रसाद देवकोटा, आमा समूहहरूको तर्फबाट सगरमाथा आमा समूहकी अध्यक्ष दीपा न्यौपाने, राजनीतिक दलको तर्फबाट नेपाली कांग्रेस गण्डकी प्रदेशका सदस्य अशोक वस्ताकोटी, गैंडाकोट उद्योग वाणिज्य संघका अध्यक्ष दीपक सापकोटा, देवचुली उद्योग वाणिज्य संघका संस्थापक अध्यक्ष धर्मराज बस्याल, उद्योग वाणिज्य संघ गण्डकी प्रदेशका अध्यक्ष अमृत भट्टचन लगायतले शुभकामना मन्तव्य राख्नुहुँदै मेला महोत्सवहरुले आर्थिक चलायमान हुने र त्यसले समाजको हित हुने धारणा व्यक्त गर्नुभएको थियो।
कार्यक्रममा पाँचौं देवचुली महोत्सवमाथि प्रकाश पार्नुहुँदै देवचुली उद्योग वाणिज्य संघका अध्यक्ष सूर्यप्रसाद दवाडीले महोत्सव सम्पन्न गर्नका लागि सहयोग गर्ने सम्पूर्णमा धन्यवाद ज्ञापन गर्दै देवचुली उद्योग वाणिज्य संघले देवचुली नगरपालिकाभित्रका उद्योगी व्यवसायीको हितमा काम गरिरहेको बताउनुभयो । औपचारिक कार्यक्रमको समापन गर्नुहुँदै देवचुली उद्योग वाणिज्य संघका निवर्तमान अध्यक्ष रेशमलाल सापकोटाले शोभा यात्राका दिन उपस्थित भएको विशाल सहभागिताले महोत्सव पूर्ण रुपमा सफल हुने आकलन गरिएको बताउनुभयो । उहाँले देवचुली महोत्सवलाई देवचुलीबासीले गौरवका रुपमा लिएको बताउँदै महोत्सवका हरेक दिन हुने कार्यक्रमहरुमा नगरवासीहरूको सक्रिय सहभागिता हुने विश्वास व्यक्त गर्नुभयो।

देवचुली महोत्सवको उद्घाटन सत्रको पहिलो दिन देवचुली नगरपालिकाका गायक गणेश विश्वकर्मा, गायिका सपना परियार लगायत अन्य कलाकारहरूको सांस्कृतिक प्रस्तुति रहेको थियो। कार्यक्रममा भृकुटी इङ्लिस बोर्डिङ स्कुलका साना नानीबाबुहरूले स्वागत नृत्य समेत प्रस्तुत गरेका थिए। देवचुली उद्योग वाणिज्य संघका वाणिज्य उपाध्यक्ष नारायणप्रसाद पौडेलको स्वागत मन्तव्य रहेको कार्यक्रमको सहजीकरण देवचुली उद्योग वाणिज्य संघका महासचिव विनोद सिलवाल र स्थानीय कलाकार व्यवस्थापन समितिका सहसंयोजक सत्यराज अधिकारीले गर्नुभएको थियो । औपचारिक कार्यक्रमको समापन भए पछी सुरु भएको सांस्कृतिक कार्यक्रमको सहजीकरण भने देवचुली उद्योग वाणिज्य संघका निवर्तमान वरिष्ठ उपाध्यक्ष तथा पाँचौं देवचुली महोत्सवका सांस्कृतिक संयोजक सत्यनारायण भुषालले गर्नुभएको थियो।

महोत्सवको उद्घाटन समारोहमा देवचुली नगरपालिकाका नगर प्रवक्ता तिलप्रसाद काफ्ले, विभिन्न वडाका वडाध्यक्षहरू, विभिन्न संघसंस्थाका अध्यक्ष एवं प्रतिनिधि, छिमेकी उद्योग वाणिज्य संघका पदाधिकारीहरू, स्थानीय समुदाय लगायतको उल्लेख्य उपस्थिति रहेको थियो।