देवचुली
नवलपुरको देवचुली नगरपालिकामा आज शनिबार देखि चौथो देवचुली मेयर कप फुटबल प्रतियोगिता सुरु भएको छ।
उद्घाटन सत्रको औपचारिक कार्यक्रम
नवलपुरको देवचुली नगरपालिकामा सञ्चालन हुने तिन ठूला कार्यक्रम मध्यको एक ' चौथो देवचुली मेयर कप फुटबल प्रतियोगिता ' आज शनिबार देखि सुरु भएको छ। देवचुली नगर युवा तथा खेलकुद विकास समितिको आयोजना सँगै फारम खेलकुद विकास समितिको सह-आयोजनामा प्रतियोगिता सुरु भएको हो।
आगामी फाल्गुन २४ गतेसम्म सञ्चालन हुने प्रतियोगिताको पहिलो दिन आज शनिबार युनाइटेड युवा क्लब र देवचुली १ खेलकुद विकास समिति बीच खेल सम्पन्न भएको छ। युवा तथा खेलकुद विकास समिति देवचुलीका अध्यक्ष दीपकचन्द्र भट्टराईको अध्यक्षता सँगै देवचुली नगरपालिकाका मेयर हरि प्रसाद न्यौपानेको प्रमुख आतिथ्यमा सम्पन्न कार्यक्रममा देवचुली नगरपालिकाका उप प्रमुख पार्वता तिवारी , देवचुली वडा न १७ का वडा अध्यक्ष गणेश शर्मा चालिसे ' दीपक ' लगायत अन्य वडाका अध्यक्षहरू , जिल्ला खेलकुद विकास समितिका अध्यक्ष सेतमान पुन तथा सचिव गिरिराज गौतम , नगर खेलकुद विकास समिति देवचुलीका पदाधिकारी , फारम खेलकुद विकास समितिका अध्यक्ष प्रकाश हमाल सहित अन्य पदाधिकारी , खेलकुद विकास समिति गैंडाकोटका उपाध्यक्ष लक्ष्मण कार्की, मुख्य प्रायोजक संस्था चौतारी सामुदायिक वन उपभोक्ता समुहका अध्यक्ष सन्त बहादुर तिवारी लगायतका व्यक्तित्वको आतिथ्यता रहेको थियो।
कार्यक्रममा आफ्नो भनाई राख्दै नगर प्रमुख तथा कार्यक्रमका प्रमुख अतिथि हरि प्रसाद न्यौपानेले देवचुली नगरपालिकालाई खेलको हबको रुपमा विकास गरिने बताउनुहुँदै कार्यक्रमको सफलताको शुभकामना दिनुभएको थियो।
फारम खेलकुद विकास समितिका सदस्य तथा खेल प्रतियोगिताका सह संयोजक सन्दिप पौडेलको स्वागत मन्तव्य रहेको कार्यक्रममा नगर खेलकुद विकास समितिका सदस्य सचिव प्रकाश काफ्लेको सहजीकरण रहेको थियो। कार्यक्रममा बरचुली माविका विधार्थीहरुको सांस्कृतिक नृत्य समेत रहेको थियो।
देवचुली १ खेलकुद विकास समिति भर्सेज युनाइटेड युवा क्लब गिरुबारी
प्रतियोगिताको पहिलो दिन आज शनिबार युनाइटेड युवा क्लब र देवचुली १ खेलकुद विकास समिति बीच भएको खेलमा देवचुली १ खेलकुद विकास समिति बिजयी भएको छ।
आज सम्पन्न खेलमा युनाइटेड युवा क्लबलाई २-१ गोल अन्तरले पराजित गर्दै देवचुली १ खेलकुद विकास समितिले जित निकालेको हो। यो जित सँगै बिजयी समूह अर्को चरणमा प्रवेश गरेको छ भने आजको खेलमा देवचुली १ खेलकुद विकास समितिका कप्तान रोशन गुरौ म्यान अफ द म्याच हुन सफल भएका छन्।
देवचुलीको फारममा रहेको बरचुली माध्यमिक विद्यालयको खेल मैदानमा सुरु भएको प्रतियोगितामा प्रथम तथा द्वितीय हुने समुहले क्रमश रु १ लाख ५५ हजार र ८१ हजार नगदको साथमा ट्रफी र प्रमाणपत्र प्राप्त गर्नेछ। यसैगरी सेमिफाइनल पुग्ने दुई टिमलाई रु २० हजार, सर्वोत्कृष्ट खेलाडीलाई रु ५ हजार, उत्कृष्ट गोल रक्षकलाई रु ५ हजार, सर्वाधिक गोलकर्तालाई रु ५ हजार र हरेक दिनका म्यान अफ द म्याचलाई एक / एक हजारको दरले पुरस्कृत गरिनेछ ।
प्रतियोगितामा नवलपुरसहित पश्चिम नवलपरासी र चितवनका गरी १५ वटा टिमको सहभागिता रहेको छ।
