देवचुली
देवचुली नगरपालिकाको गौरवको रुपमा आयोजना हुन लागेको ५ औं देवचुली महोत्सवको लागी हरेक दिन आयोजक र सरोकारवाला निकायहरू बिच छलफल तथा अन्तरक्रियाको क्रम जारी रहेको छ।
बिहीबार महोत्सवका आयोजक देवचुली उद्योग वाणिज्य संघले नगर भित्रका ५ वटा विभिन्न वडामा रहेका आमा समुह तथा टोल विकास संस्था सँग छलफल गरेको छ। संघले आज एकै दिन देवचुली नगरपालिकाका वडा न ९ , वडा न १० , वडा न १२ , वडा न १५ र वडा न १७ मा सम्बन्धित वडा कार्यालयमा छलफल गरेको देवचुली महोत्सवको संघसंस्था समन्वय उप समितिका संयोजक तिलादेवी अर्यालले हेर्नेपाटीलाई बताउनुभएको छ।
अर्यालका अनुसार महोत्सवलाई सफल पार्नको लागी देवचुली ९ मा ईश्वरी पँगेनी , देवचुली १० मा रिता खरेल आचार्य , देवचुली १२ मा राधिका अधिकारी , देवचुली १५ शिवलाल गैरे र देवचुली १७ मा पार्वती पौडेल आचार्य लगायतको संयोजकत्वमा उप समितिहरू गठन गरिएको छ। गठित वडागत उप समितिहरूमा सम्बन्धित वडा भित्र रहेका विभिन्न आमा समूह , टोल विकास संस्था तथा कृषक समुहहरूलाई समावेश गरिएको छ।
देवचुली उद्योग वाणिज्य संघले आगामी फाल्गुन १२ गतेदेखि २५ गतेसम्म आयोजना गर्ने महोत्सवलाई सभ्य र भव्य रुपमा सम्पन्न गर्नको लागी आज आयोजित छलफल कार्यक्रममा सम्बन्धित वडाका वडा अध्यक्षहरूको प्रमुख आतिथ्यता सँगै देवचुली महोत्सवको संघसंस्था समन्वय उप समितिका संयोजक तिलादेवी अर्यालको अध्यक्षता रहेको थियो।
यसपटकको देवचुली महोत्सव अघिल्ला महोत्सव भन्दा केही पृथक हुने र यस महोत्सवमा १५० वटा भन्दा बढी व्यापारिक स्टल, २० वटा कृषि, पर्यटन, शिक्षा, स्वास्थ्य लगायतका प्रर्वद्धनात्मक स्टल, बाल उद्यान, विभिन्न प्रकारका पिङ तथा झुलाहरु , जातीय पहिचान झल्कने घर र सामग्री प्रदर्शनी, औद्योगिक उत्पादनहरूको प्रदर्शनी, ६० भन्दा बढी राष्ट्रिय र स्थानीय कलाकारको सहभागिता हुने साथै १ लाख ५० हजार दर्शक भित्र्याउने र १५ करोडको कारोबार गर्ने लक्ष्य राखिएको छ।
