देवचुली
देवचुली नगरपालिकामा फाल्गुन महिनामा मात्र ३ वटा ठूला कार्यक्रमहरू हुने भएका छन्।
नगरको गौरवको रुपमा रहेको पाँचौ देवचुली महोत्सवको साथमा चौथो मेयर कप फुटबल प्रतियोगिता र मगर एकता दिवसको अवसरमा विविध सांस्कृतिक हुने भएको हो।
पाँचौ देवचुली महोत्सव ( देवचुली १४ )
देवचुली महोत्सव फागुन १२ गतेबाट सुरु हुने देवचुली उद्योग वाणिज्य सङ्घका अध्यक्ष सूर्यप्रसाद दवाडीले जानकारी दिनुभएको छ। देवचुली उद्योग वाणिज्य सङ्घको आयोजनामा आगामी फाल्गुन १२ गतेबाट २५ गतेसम्म पाँचौँ देवचुली महोत्सव आयोजना गरिएको हो। महोत्सव देवचुली १४ को छत्तीस घरमा घरमा गरिने आयोजकले जानकारी दिएको छ।
यसपटकको देवचुली महोत्सव अघिल्ला महोत्सव भन्दा केही पृथक हुने र यस महोत्सवमा १५० वटा भन्दा बढी व्यापारिक स्टल, २० वटा कृषि, पर्यटन, शिक्षा, स्वास्थ्य लगायतका प्रर्वद्धनात्मक स्टल, बाल उद्यान, विभिन्न प्रकारका पिङ तथा झुलाहरु , जातीय पहिचान झल्कने घर र सामग्री प्रदर्शनी, औद्योगिक उत्पादनहरूको प्रदर्शनी, ६० भन्दा बढी राष्ट्रिय र स्थानीय कलाकारको सहभागिता हुने साथै १ लाख ५० हजार दर्शक भित्र्याउने र १५ करोडको कारोबार गर्ने लक्ष्य राखिएको छ।
देवचुली नगरपालिकाको समग्र आर्थिक, सांस्कृतिक तथा सामाजिक उत्थानका लागि शिक्षा, कृषि, पर्यटन, व्यापार, स्वास्थ्य क्षेत्रको प्रर्वद्धनमा टेवा पुर्याउने उद्देश्यले महोत्सवको आयोजना गरिएको हो।
चौथो मेयर कप फुटबल प्रतियोगिता ( देवचुली १७ )
देवचुली १७ फारममा चौथो देवचुली मेयर कप फुटबल प्रतियोगिता हुने भएको छ। देवचुली नगर युवा तथा खेलकुद विकास समितिको आयोजना र फारम खेलकुद विकास समितिको सह-आयोजनामा प्रतियोगिता हुन लागेको आयोजकले जानकारी दिएको छ।
देवचुली १७ मा रहेको वरचुली माध्यमिक विद्यालयको खेलमैदानमा आगामी फाल्गुन १० गतेबाट हुने फुटबल प्रतियोगितामा प्रथम हुने टिमले १ लाख ५५ हजार मेडल, प्रमाणपत्र र ट्रफी, द्वितीय हुने टिमले ८१ हजार मेडल र प्रमाणपत्र र सेमिफाइनल पुग्ने टिमले २० हजार रुपैयाँ र प्रमाणपत्र प्राप्त गर्ने फारम खेलकुद विकास समितिका अध्यक्ष प्रकाश हमालले जानकारी दिनुभयो ।
देवचुली नगरपालिकामा खेलकुदको विकास र युवाहरूको क्षमता विकासका लागि वर्षेनी खेलकुद प्रतियोगिताहरू आयोजना गर्दै आइरहेको देवचुली नगर युवा तथा खेलकुद विकास समितिका अध्यक्ष दीपकचन्द्र भट्टराईले बताउनुभयो । उहाँले नगर खेलकुद समितिले फुटबल मात्र नभई हरेक खेलका प्रतियोगिताहरू आयोजना गर्ने बताउनुभयो।
मगर एकता दिवस तथा विविध सांस्कृतिक कार्यक्रम ( देवचुली १० )
४३ औं मगर एकता दिवसको अवसरमा देवचुली १० पृथ्वी नगरमा विविध सांस्कृतिक कार्यक्रम हुने भएको छ। पृथ्वी मगर समाजको आयोजनामा फागुन १२ गतेदेखि तिन दिन सम्म विविध सांस्कृतिक कार्यक्रमको आयोजना गरिएको छ।
