देवचुली
दिव्य एकेडेमी देवचुली १ ले आफ्नो स्थापनाको २१ औं वार्षिकोत्सव मनाएको छ। विद्यालयले एक कार्यक्रमको आयोजना गरेर आफ्नो वार्षिकोत्सव मनाएको हो।
विद्यालयका प्रबन्ध निर्देशक तुलमणि पौडेलको अध्यक्षतामा सम्पन्न कार्यक्रममा देवचुली नगरपालिकाका प्रवक्ता तिल प्रसाद काफ्लेको प्रमुख आतिथ्यता रहेको थियो।

विद्यालयका शिक्षक निमा तिवारीको स्वागत मन्तव्य रहेको कार्यक्रममा विद्यालयका शिक्षिकाहरूको नृत्य सँगै विद्यार्थीहरूको गायन , नृत्य , कराते सँगै नाटक लगायतको प्रस्तुति रहेको थियो।

विद्यालयको २१ औं वार्षिकोत्सव तथा अभिभावक दिवसको अवसर पारेर विभिन्न समयमा विद्यालयमा आयोजना गरिएको कार्यक्रमका विजेता विद्यार्थीहरूलाई पुरस्कार वितरण सँगै विद्यालयमा लामो समयदेखि कार्यरत शिक्षक तथा कर्मचारीहरूलाई सम्मान गरिएको थियो।

" चाडपर्वहरूको चाडपर्व " भन्ने उद्देश्यका साथमा विभिन्न प्रदर्शनी स्टलहरू राखी विद्यार्थीहरूले विज्ञान प्रदर्शनी , परम्परागत कृषि औजारको साथमा सञ्चार तथा भान्साका सामाग्रीहरूको प्रदर्शनी सँगै फुड स्टल समेत राखेका थिए।

विद्यालयका प्रधानाध्यापक कोपिला भण्डारीको सहजीकरण रहेको कार्यक्रममा प्याब्सन देवचुलीका अध्यक्ष सन्त बहादुर क्षेत्री , देवचुली ३ का वडा अध्यक्ष होमनाथ पौडेल , देवचुली १२ का वडा अध्यक्ष लोक प्रसाद भुर्तेल , जिल्ला समन्वय समितिका सदस्य सरू पाठक लगायतका व्यक्तिहरूको आतिथ्यता रहेको थियो।

कार्यक्रममा बोल्ने वक्ताहरूले विद्यालयले यहाँ सम्मको यात्रा तय गर्ने क्रममा हजारौं बालबालिकाको भविष्य उज्यालो बनाउँदै यस क्षेत्रमा आफ्नो फरक र पृथक पहिचान बनाउन सफल भएकोमा बधाई दिँदै २१ औं वार्षिकोत्सवको शुभकामना व्यक्त गरेका थिए।