देवचुली
आइटी एप्लिकेसन तथा व्यवस्थापन सम्बन्धी ३० औँ अन्तर्राष्ट्रिय संघोष्ठीमा सहभागी हुन लुम्बिनी आएका विभिन्न देशका प्रोफेसरहरुलाई विश्वज्योति माध्यमिक विद्यालयले स्वागत तथा सम्मान गरेको छ ।
काठमाडौँमा टेक्सस इन्टरनेसनल कलेजको आयोजनामा फेब्रुअरी १२ देखि १६ सम्म सञ्चालन हुने इटाम कन्फरेन्सको उद्घाटन सत्रको कार्यक्रम सकिएपछी समापन सत्रको कार्यक्रममा सहभागी हुन लुम्बिनी हिँडेका विभिन्न १५ वटा देशका विश्वविद्यालयका प्रोफेसरहरुलाई विश्वज्योति माध्यमिक विद्यालयले एक कार्यक्रमको आयोजना गरी सम्मान गरेको हो। कार्यक्रमको अध्यक्षता विद्यालय व्यवस्थापन समितिका अध्यक्ष मोतीप्रसाद अर्यालले गर्नुभएको थियो।
कार्यक्रममा श्री १००८ स्वरूपानन्द सरस्वतीजी महाराज प्रमुख अतिथिको रुपमा रहनुभएको थियो। कार्यक्रममा बोल्दै प्रमुख अतिथि सरस्वतीजी महाराजले विभिन्न देशका लब्धप्रतिष्ठित प्रोफेसरहरुलाई विश्वज्योतिको आँगनमा स्वागत गर्न पाउनु खुसीको कुरा भएको बताउनुभयो ।
उहाँले विशिष्ट व्यक्तिहरूको बाणीले विद्यार्थी वर्गलाई थप ज्ञान प्राप्त हुने र भोलीका दिनमा विश्वस्तरमा पुग्न प्रेरणा मिल्ने बताउनु भयो । कार्यक्रममा आफ्ना मन्तव्य राख्नुहुँदै हान्याङ युनिभर्सिटी कोरियाका प्रोफेसर तथा इटाम सोसाइटीका अन्तर्राष्ट्रिय अध्यक्ष नामजे चोले विश्वज्योति माध्यमिक विद्यालयलाई भविष्यमा अन्तर्राष्ट्रिय स्तरको स्कुलको रुपमा आँफूले चित्रण गरेको बताउनुभयो ।
उहाँले विश्वज्योति माध्यमिक विद्यालयले शिक्षण सिकाइलाई विश्व स्तरमा पुर्याइरहेको सन्दर्भमा निकट भविष्यमै विद्यालयलाई अन्तर्राष्ट्रिय स्तरको विद्यालयको रूपमा देख्न सकिने बताउनुभयो। यसैगरी आफ्ना मन्तव्य राख्नुहुँदै लिंकन युनिभर्सिटीका प्रोफेसर तथा इटानका सदस्य सतिशकुमार ओझाले विश्वज्योति माध्यमिक विद्यालयले शिक्षामा गरेको लगानी र गरेका प्रयासहरूका बारेमा वर्णन गर्न आफूसँग कुनै शब्द नरहेको बताउनुभयो ।
उहाँले विद्यालयका संस्थापक प्रिन्सिपल बिष्णुप्रसाद बास्तोलाको मुक्तकण्ठले प्रशंसा गर्दै अभिभावक भनेको विष्णु बास्तोला जस्तो हुनुपर्ने बताउनुभयो। कार्यक्रममा धन्यवाद मन्तव्य राख्नुहुँदै विश्वज्योती माध्यमिक विद्यालयका प्रीन्सिपल डा. प्रदीप बास्तोलाले विश्वका नाम चलेका र ख्याती कमाएका प्रोफेसरहरुलाई विद्यालयमा स्वागत गर्न पाउनु गर्वको विषय रहेको बताउनुभयो।
स्वागत तथा सम्मान कार्यक्रममा युनिभर्सिटी अफ इन्डोनेसिया, हान्याङ युनिभर्सिटी कोरिया, लिङ्कन युनिभर्सिटी मलेसिया, टेक्सस इन्टरनेसनल कलेज, बुद्धिस्ट स्टडीज त्रिभुवन युनिभर्सिटी लगायत नेपालका चार विश्वविद्यालयसहित विश्वका १५ वटा विश्वविद्यालयका ३५ जना प्रोफेसरहरूको उपस्थिति रहेको थियो। कार्यक्रममा उपस्थित पाहुनाहरूलाई स्वागत मन्तव्य सहित धन्यवाद व्यक्त गर्नुहुँदै विद्यालयका संस्थापक प्रिन्सिपल विष्णुप्रसाद बास्तोलाले विश्वज्योति माध्यमिक विद्यालयले अभिभावकको चाहना र समाजको आवश्यकतालाई मध्यनजर गरी विद्यालय सञ्चालन गरेको बताउनुभयो ।
कार्यक्रममा विद्यालयका विद्यार्थीहरूले विभिन्न सांस्कृतिक नृत्यसहित उपस्थित पाहुनाहरूलाई मनोरञ्जन प्रदान गरेका थिए।
विद्यालयका को-अर्डिनेटर डा.चन्दा न्यौपाने र शिक्षक गुनाराज थापाको सहजीकरण रहेको कार्यक्रममा विद्यालयका शिक्षक, विद्यार्थी लगायत शिक्षाप्रेमीको उपस्थिति रहेको थियो।
