देवचुली
नवलपुरको देवचुली १७ फारममा रहेको बरचुली माध्यमिक विद्यालयले आफ्नो स्थापनाको ४४ औं वार्षिकोत्सव तथा अभिभावक दिवस भव्यताका साथ सम्पन्न गरेको छ।
बिहीवार विद्यालय व्यवस्थापन समितिका अध्यक्ष प्रेम बहादुर थापाको अध्यक्षता सँगै देवचुली नगरपालिकाका नगर प्रमुख हरिप्रसाद न्यौपानेको प्रमुख आतिथ्यमा कार्यक्रम सम्पन्न भएको हो ।
कार्यक्रममा प्रमुख अतिथि न्यौपाने सहित देवचुली १७ का वडा अध्यक्ष गणेश शर्मा चालिसे र नवलपुर जिल्ला शिक्षा विकास तथा समन्वय इकाई प्रमुख दिपेन्द्रराज श्रेष्ठ लगायतले शुभकामना मन्तव्य राख्नुभएको थियो।
सोही करमा कार्यक्रमका प्रमुख अतिथि समेत रहनुभएका नगर प्रमुख न्यौपानेले बरचुली माविमा अध्ययनरत विद्यार्थीको अनुशासन र लगनशीलताको खुलेर प्रशंसा गर्नुभएको थियो। विद्यालयको ४४ औं वार्षिकोत्सवको अवसरमा शुभकामना राख्नुहुँदै न्यौपानेले देवचुली नगरपालिकाको शैक्षिक गुणस्तर सुधार गर्न यस बरचुली माविले महत्वपूर्ण भूमिका खेलेको बताउनुहुँदै यसको लागी धन्यवाद व्यक्त गर्नुभएको थियो।
विद्यालय परिसरमा सम्पन्न कार्यक्रममा महिला अभिभावकहरूको बीचमा म्युजिकल चियर र पुरुष अभिभावकहरूको बीचमा तातो आलु खेल खेलाइएको थियो । उक्त कार्यक्रममा महिला तर्फको खेलमा पार्वती पौडेल प्रथम , बबिता सुवेदी द्वितीय र लक्ष्मी सुनार तृतीय हुनुभएको थियो भने पुरुष तर्फको खेलमा जीवन सापकोटा प्रथम , ईश्वरी पौडेल द्वितीय र हिरा सिं कुमाल तृतीय हुनुभएको थियो। वार्षिकोत्सवको अवसरमा विद्यालयले विभिन्न व्यक्तित्वहरूलाई सम्मान समेत गरेको छ।
कार्यक्रममा एसईई २०८० को परीक्षामा उत्कृष्ट अङ्क ल्याउने विद्यार्थी तथा यसमा पुर्याउने शिक्षक तथा कर्मचारी , राष्ट्रपति रनिङ शिल्ड र राष्ट्रिय स्तरको खेलकुद प्रतियोगितामा सहभागी भई उत्कृष्ट हुन सफल विद्यार्थी , उत्कृष्ट १० जना अभिभावक , यस वर्ष विद्यालयमा अक्षयकोष स्थापनामा सहयोग पुर्याउने ३ जना अक्षयकोष दाताहरूलाई सम्मान गरिएको थियो।
विद्यालयको ४४ औं वार्षिकोत्सवको अवसरमा विद्यार्थीहरूले पञ्चेबाजा र उत्कृष्ट नृत्यद्वारा उपस्थित सम्पूर्ण अतिथि तथा अभिभावकलाई स्वागत गरेका थिए ।
