देवचुली
नवलपुरको देवचुली नगरपालिकामा रहेको भीमसेन आदर्श नमुना माध्यमिक विद्यालयले स्थापनाको ५५ औ बार्षिकोत्सव मनाएको छ। विद्यालयले मंगलबार एक भव्य कार्यक्रमको आयोजना गरी ५५ औ वार्षिकोत्सव तथा अभिभावक दिवस मनाएको हो।
कार्यक्रमको अध्यक्षता विद्यालय व्यवस्थापन समितिका अध्यक्ष भूमिलाल लामिछानेले गर्नुभएको थियो भने कार्यक्रमको प्रमुख अतिथिका रुपमा देवचुली नगरपालिकाका नगरप्रमुख हरिप्रसाद न्यौपाने रहनुभएको थियो। कार्यक्रममा आफ्ना शुभेच्छाका शब्द राख्नुहुँदै प्रमुख अतिथि न्यौपानेले भीमसेन आदर्श नमुना मावि नवलपुर जिल्लामा मात्र नभई देशभरमै उत्कृष्ट विद्यालय कहलिन सफल भएकोमा नगरपालिकाकै गर्वको कुरा रहेको बताउनुभयो ।
उहाँले भीमसेन आदर्श नमुना माविले देवचुली नगरपालिकामा रहेका सम्पूर्ण सामुदायिक विद्यालयहरूको अभिभावकत्व ग्रहण गर्नुपर्ने बताउँदै भीमसेनबाट अन्य विद्यालयहरूले पनि शिक्षण सिकाई र व्यवस्थापकीय पक्षको सिकाई पनि गर्नुपर्ने बताउनुभयो । विद्यालयको सर्वाङ्गिण विकासका लागि देवचुली नगरपालिकाले सधैं सकारात्मक सहयोग गर्दै आएको प्रसङ्ग उठाउँदै नगर प्रमुख न्यौपानेले आगामी नगरसभाबाट भीमसेनको अधुरो भवन निर्माणका लागि १० लाख रकम विनियोजन गर्ने समेत प्रतिबद्धता व्यक्त गर्नुभयो कार्यक्रममा देवचुली नगरपालिकाका प्रमुख प्रशासकीय अधिकृत दिवाकर पौडेल, शिक्षा शाखा प्रमुख रामप्रसाद शर्मा, शिक्षा विकास तथा समन्वय इकाई नवलपुरका प्रमुख दिपेन्द्र राज श्रेष्ठ, विद्यालयका निवर्तमान प्रधानाध्यापक नरदेव न्यौपाने, शिक्षक अभिभावक संघका अध्यक्ष देवकी पौडेल अधिकारी लगायतले शुभकामना मन्तव्य राख्नुभएको थियो।
भीमसेन आदर्श नमुना माध्यमिक विद्यालयको कोष वृद्धिका लागि २०६५ सालमा आयोजना गरिएको धनधान्याञ्चल महायज्ञमा १० हजार भन्दा माथी सहयोग गर्नुहुने सहयोगी दाता र अक्षयकोष दाताहरूको नामावली रहेको शिलालेख समेत वार्षिकोत्सव समारोहमा नगर प्रमुख हरिप्रसाद न्यौपानेले अनावरण गर्नुभयो। नगरप्रमुख न्यौपाने सहितका विशिष्ट व्यक्तित्वहरूले भीमसेन माविको "भीमसेन शैक्षिक दर्पण २०८१" समेत विमोचन गर्नुभएको थियो।
विद्यालयको शैक्षिक प्रगति र भावी योजनाका बारेमा आफ्ना प्रतिवेदन प्रस्तुत गर्दै विद्यालयका प्रधानाध्यापक अग्निधर भुसालले भीमसेन आदर्श नमुना मावि आजको दिनसम्म आइपुग्दा कोही एकजना व्यक्तिको मेहनतले मात्र नभई समग्र अभिभावक, विद्यार्थी, शिक्षक, कर्मचारी, व्यवस्थापन समिति लगायत सम्पूर्ण सरकारवालाहरूको अथक मेहनतले भीमसेनले शैक्षिक जगतमा उत्कृष्ट हुन सफल भएको बताउनुभयो।
कार्यक्रममा विद्यालयको शैक्षिक विकासमा योगदान पुर्याउनु हुने २७ जना शिक्षक, ३ जना कर्मचारी र १ जना कराते प्रशिक्षकलाई समेत सम्मान गरिएको थियो। यसैगरी विभिन्न समयमा शैक्षिक नतिजा र अतिरिक्त क्रियाकलापमा उत्कृष्ट प्रदर्शन गर्ने १३ जना विद्यार्थीहरूलाई समेत सम्मान गरिएको थियो। साथै विभिन्न समयमा आयोजना गरिएको खेलकुद र उत्कृष्ट नतिजा ल्याउने विद्यार्थीहरुलाई पुरस्कृत समेत गरिएको थियो।
कार्यक्रममा विद्यालयका निवर्तमान व्यवस्थापन समिति, शिक्षक अभिभावक संघ र निर्माण समितिका २६ जनालाई सम्मान समेत गरिएको थियो। सोही अवसरमा भीमसेनमा अध्यापन गराउनुभएका ३० जना शिक्षकहरुलाई विदाई समेत गरिएको थियो।
विद्यालयका सहायक प्रधानाध्यापक करणबहादुर खड्काले स्वागत मन्तव्य राख्नुभएको कार्यक्रमको सहजीकरण विद्यालयका शिक्षकत्रय कृष्णप्रसाद काफ्ले, विष्णुप्रसाद न्यौपाने र कृष्णकला काफ्लेले गर्नुभएको थियो।
विभिन्न साँस्कृतिक कार्यक्रम, नृत्य र नाटक समेत प्रस्तुत गरिएको ५५ वार्षिकोत्सव तथा अभिभावक दिवसमा देवचुली नगरपालिकाका शिक्षा अधिकृत नन्दलाल ढकाल, वडा नं ७ का वडाध्यक्ष भूमिसरा आले, वडा नम्बर ८ का वडाध्यक्ष नुनप्रसाद बाचे, वडा नम्बर ९ का वडाध्यक्ष बलिराम सापकोटा लगायत विभिन्न जनप्रतिनिधि र विद्यालयसँग सरोकार राख्ने शैक्षिक सरकारवाला व्यक्तित्वहरूको उल्लेख्य उपस्थिति रहेको थियो।
-1737979213.jpg)
