देवचुली
जनचेतना बचत तथा ऋण सहकारी संस्थाको २८ औं वार्षिक साधारण सभा आज शनिबार सम्पन्न भएको छ। संस्थाको कार्यालय परिसरमा सम्पन्न कार्यक्रममा कार्यवाहक अध्यक्ष भीम प्रसाद बस्यालको अध्यक्षता तथा जिल्ला सहकारी सङ्घ लिमिटेडका अध्यक्ष तिलक प्रसाद पराजुलीको प्रमुख आतिथ्यता रहेको थियो।
सञ्चालक समिति सदस्य जमुना सुबेदीको स्वागत मन्तव्य रहेको कार्यक्रममा संस्थाका कार्यवाहक अध्यक्ष बस्यालले अध्यक्षको प्रतिवेदन , लेखा संयोजक रामचन्द्र ठकुरीले लेखा प्रतिवेदन , कोषाध्यक्ष बालकृष्ण कँडेलले आर्थिक प्रतिवेदन तथा सचिव सन्दिप पौडेलले सचिवको प्रतिवेदन प्रस्तुत गरेका थिए। संस्थाका शेयर सदस्यहरूको उपस्थितिमा प्रस्तुत गरिएका प्रतिवेदनहरूले संस्थामा हाल सम्म भएका प्रगतिको जानकारी गराउँदै आगामी योजनाहरूको बारेमा जानकारी गराइएको थियो।
संस्थाका सचिव पौडेलको सहजीकरण रहेको कार्यक्रममा नेफ्स्कुनका फिल्ड कार्यालय संचालक तुलमणि पौडेल , संस्थाका पूर्व अध्यक्ष तथा सल्लाहकार कृष्ण प्रसाद सापकोटा , नगर सहकारी सञ्जाल देवचुलीका अध्यक्ष रेनुका बस्ताकोटीले शुभकामना मन्तव्य राख्ने क्रममा संस्थाले हाल सम्म गरेका कार्यहरू सराहनीय रहेकाले यसलाई निरन्तरता दिँदै शेयर सदस्यहरूको हकहितमा कार्य गर्न आग्रह गरेका थिए।
कार्यक्रममा ज्येष्ठ नागरिक , उत्कृष्ट नियमित (मासिक) बचत , उत्कृष्ट वाल बचत , उत्कृष्ट सुनौलो भविष्य बचत , उत्कृष्ट खुत्रुके बचत , उत्कृष्ट ऐच्छिक बचत , उत्कृष्ट दैनिक बचत , असल ऋणी , लघुवित्त (बचत) , सक्रिय सदस्य , लघुवित्त (ऋण) , अधिकतम शेयर खरीद लगायत गरि जम्मा १३ वटा विधामा सम्मान गरिएको थियो। सोही क्रममा संस्थाले एसईई मा उत्कृष्ट नतिजा ल्याउने ३ जना विद्यार्थीलाई छात्रवृति प्रदान समेत गरेको छ।
आज सम्पन्न २८ औं वार्षिक साधारण सभाले संस्थाको रिक्त रहेको अध्यक्ष पदमा हालका कार्यवाहक अध्यक्ष भीम प्रसाद बस्याल अध्यक्षको जिम्मेवारी दिने निर्णय गरेको छ। यो सँगै बस्याल अध्यक्ष पदमा निर्वाचित भएपछि सोतह रिक्त हुने उपाध्यक्ष पदको जिम्मेवारी विष्णुकुमार वाग्लेलाई दिने भनी निर्णय गरेको छ।
