पुसे १५ को अवसरमा देवचुलीमा जिल्लास्तरीय पुरुष तथा महिला भलिबल प्रतियोगिता हुँदै

खेलकुद

गृहपृष्ठ
खेलकुद

पुसे १५ को अवसरमा देवचुलीमा जिल्लास्तरीय पुरुष तथा महिला भलिबल प्रतियोगिता हुँदै

एलिना केसी मंगलबार, पुस ९, २०८१

देवचुली,

"स्वास्थ्यका लागि खेलकुद, राष्ट्रका लागि खेलकुद" भन्ने नाराका साथ देवचुलीमा जिल्लास्तरीय पुरुष तथा महिला भलिबल प्रतियोगिता हुने भएको छ । पुसे १५ को अवसरमा आयोजित ३० औँ जिल्लास्तरीय पुरुष भलिबल तथा छैंठौ महिला भलिबल प्रतियोगिता २०८१ हुने भएको हो । देवचुली नगरपालिका युवा तथा खेलकुद विकास समितिको आयोजना, देवचुली नगरपालिका वडा नं ९ वडा कार्यालयको समन्वय र देवचुली नगरपालिका वडा ९ युवा तथा खेलकुद विकास समितिकाे सहकार्यमा देवचुली नगरपालिका वडा नं ९ विशालटार घुमाउरी पिकनिक स्पट खेलमैदानमा पौष १० गते देखि १५ गते सम्म हुने भएको छ ।

प्रतियोगितामा नवलपुर जिल्ला भित्रका २० समूहका युवा खेलाडीहरुको सहभागिता रहने देवचुली खेलकुद विकास समितिका अध्यक्ष कृष्णबहादुर आलेले जानकारी दिनुभयो । उहाँले देवचुलीको खेललाई अगाडि बढाउन विगत देखि नै भलिबल प्रतियोगिता आयोजना गर्दै आएकोले यसवर्ष पनि निरन्तरता दिएको बताउनुभयो । साथै उहाँले खेललाई भव्य रुपमा सम्पन्न बनाउन सबैको सहयोगको आवश्यकता रहेको बताउनुभएको थियो ।

देवचुलीमा हरेक वर्ष नयाँ खेलाडी उदाइरहेकोले यस्ता प्रतियोगिता आयोजना गर्दा खेलाडीलाई थप प्रोत्साहन गर्ने देवचुली नगरपालिका वडा नं ९ का वडाध्यक्ष बलिराम सापकोटाले बताउनुभयो । उहाँले भलिबल खेललाई जिवन्त राख्न ३० वर्ष देखि निरन्तर अघि बढिरहेको बताउँदै यसलाई सफल बनाउन सबै खेलप्रेमीलाई मैदान सम्म आउन आग्रह गर्नुभएको थियो ।
उक्त पुरुष भलिबल प्रतियोगितामा प्रथम हुने टिमले ४५ हजार, द्वितीय हुने टिमले २५ हजार र तृतीय हुने टिमले नगद १५ हजार साथमा मेडल ट्रफी र प्रमाण पत्र प्राप्त गर्नेछन् भने महिला तर्फ प्रथम हुने टिमले १५ हजार, द्वितीय हुने टिमले १० हजार र तृतीय हुने टिमले नगद ५ हजार साथमा मेडल ट्रफी र प्रमाण पत्र प्राप्त गर्नेछन् । प्रतियोगिताको अवधिभर उत्कृष्ट खेल प्रदर्शन गर्ने उत्कृष्ट पुरुष तथा महिला खेलाडीलाई पनि पुरस्कृत गरिने आयोजकले जनाएको छ।
खेलको समुद्घाटन बुधबार दिउँसो १ बजे हुने जनाइएको छ ।

प्रकाशित मिति: मंगलबार, पुस ९, २०८१ १८:१७