बाढी–पहिरो पीडितलाई राष्ट्र संघको साढे ४५ करोड बराबर सहयोग

देश

गृहपृष्ठ
देश

बाढी–पहिरो पीडितलाई राष्ट्र संघको साढे ४५ करोड बराबर सहयोग

हेर्नेपाटी बिहीबार, कात्तिक १, २०८१

काठमाडौं

गत असोज दोस्रो साता आएको बाढी–पहिरोबाट पीडितलाई संयुक्त राष्ट्र संघले ३४ लाख अमेरिकी डलर (४५ करोड ५६ लाख रुपैयाँ) बराबर सहायता दिने भएको छ ।

राष्ट्र संघको सेन्ट्रल इमर्जेन्सी रेस्पोन्स फन्डमार्फत उक्त सहायता दिन लागिएको हो । कोसी र मधेश प्रदेशका सुनसरी र सप्तरी जिल्लाका कोसी नदी पीडितलाई ‘एन्टिसिपेटरी एक्सन फ्रेमवर्क’ अनुसार राष्ट्र संघले सहायता गर्न लागेको हो ।

उक्त सहायता अन्तर्गत राष्ट्र संघको खाद्य तथा कृषि संगठन (एफएओ) ले त्यहाँका किसानलाई बीउबीजन सुक्खा राख्न हमेर्टिक झोला उपलब्ध गराउने छ भने संयुक्त राष्ट्र संघ जनसंख्या कोषले लैंगिक हिंसा सम्बोधन गर्न, मातृ मृत्युदर घटाउन तथा महिला एवं बालबालिकाको शारीरिक स्वच्छतामा काम गर्दै आएको छ ।

त्यसैगरी युनिसेफले डिजिटल नगदका साथै खानेपानी र सरसफाइ सामग्री उपलब्ध गराइरहेको छ । विश्व खाद्य कार्यक्रमले आवश्यक सामग्री खरिद गर्न डिजिटल नगद उपलब्ध गराइरहेको छ ।

बाढी–पहिरोबाट २ सय ४९ को मृत्यु, १ सय ७८ घाइते र १८ जना बेपत्ता छन् ।

‘जोखिममा रहेको समुदायलाई आवश्यक सेवामा पहुँच बढाउन र आम्दानी गुम्न नदिन यो सहायताबाट सहयोग पुग्ने विश्वास छ,’ राष्ट्र संघको नेपालस्थित आवासीय संयोजक हना सिंगर–ह्याम्डीले भनिन्, ‘राष्ट्र संघ, नेपाल सरकार र हाम्रा मानवीय सहायता साझेदारहरूको सहकार्यबाट यस्तो सहयोग सम्भव हुँदै आएको छ ।’

साभार ः अनलाईनखबरबाट

प्रकाशित मिति: बिहीबार, कात्तिक १, २०८१ १९:१०