घुमाउरी सामुदायिक वनको ३० औं साधारण सभा सम्पन्न

देवचुली

गृहपृष्ठ
देवचुली

घुमाउरी सामुदायिक वनको ३० औं साधारण सभा सम्पन्न

एलिना केसी बुधबार, असोज ३०, २०८१

देवचुली,

देवचुली नगरपालिकामा रहेको घुमाउरी सामुदायिक वन उपभोक्ता समूहको ३० औं वार्षिक साधारण सभा सम्पन्न भएको छ । बुधबार घुमाउरी सामुदायिक वनको पिकनिक स्पटमा कार्यक्रम सम्पन्न भएको हो । घुमाउरी सामुदायिक वनका अध्यक्ष पार्वती राउलको अध्यक्षता रहेको कार्यक्रममा देवचुली नगरपालिका वडा नं ९ का वडाध्यक्ष बलिराम सापकोटाको प्रमुख आतिथ्यता रहेको थियो ।
कार्यक्रममा बोल्दै प्रमुख अतिथी रहनुभएका सापकोटाले भीष्म परिस्थतिमा पनि घुमाउरी सामुदायिक वनले पिकनिक स्पटबाट राम्रो आम्दानी गरेकोमा खुशी लागेको बताउनुभयो । साथै उहाँले सामुदायिक वनको माध्यमबाट राम्रो आम्दानीको स्रोत हुने भएकाले महिलाहरुलाई उद्यमी बनाउनुपर्ने बताउनुभएको थियो । महिलाहरुलाई उद्यमी बनाउन सामुदायिक वनसँग वडाले पनि सहकार्य गर्ने बताउनुभयो ।

यसैगरि कार्यक्रममा सव डिभिजन वन कार्यालय देवचुली बुलिङ्गटारका वन अधिकृति बसन्त दाहाल, स्थानीय महासंघका अध्यक्ष कृष्ण प्रसाद तिवारी, देवचुली बाल सञलका उपाध्यक्ष प्रितम कार्की, देवचुली ९ का वडा खेलकुद विकास समितिका अध्यक्ष कृष्ण आले, एकता सामुदायिक वनका अध्यक्ष यम प्रसाद भुसाल, घुमाउरी सामुदायिक वनका पूर्व अध्यक्ष दिपक भट्टराई लगायतले शुभकामना मन्तव्य व्यक्त गरेका थिए ।

कार्यक्रममा घुमाउरी सामुदायिक वनका अध्यक्ष पार्वती राउलले आर्थिक वर्ष २०८०/०८१ को प्रगति प्रतिवेदन प्रस्तुत गर्नुभएको थियो । उहाँले घुमाउरी सामुदायिक वन परिसरमा रहेको पिकनिक स्पट परिसमा देवचुली नगरपालिकाको आर्थिक सहयोगमा तारजाली निर्माण गरिएको र झोलुङ्गे पुल निर्माण कार्य समापन भएको र उद्घाटन गर्न बाँकी रहेको बताउनुभएको थियो ।

घुमाउरी सामुदायिक वनका कोषाध्यक्ष सोम बहादुर सेन्चुरीले कोषाध्यक्षको प्रगति प्रतिवेदन प्रस्तुत गर्नुभएको थियो । कार्यक्रममा घुमाउरी सामुदायिक वनका उपभोक्ता, स्थानीय बुद्धिजीवी, विभिन्न संघसंस्थामा आबद्ध पदाधिकारी, सुरक्षाकर्मी लगायतको उपस्थिति रहेको थियो । कार्यक्रममा भिमदत्त दवाडीले घुमाउरी सामुदायिक वनको विषयमा कविता प्रस्तुत गर्नुभएको थियो । घुमाउरी सामुदायिक वनका सल्लाहकार संयोजक विष्णु प्रसाद भुसालले स्वागत मन्तव्य राख्नुभएको कार्यक्रमको सहजीकण सचिव कुन्तादेवि काफ्ले न्यौपानेले गर्नुभएको थियो ।