नवलपुरमा नारायणी तटीय क्षेत्रका सयौं घर डुबानमा

कावासोती

गृहपृष्ठ
कावासोती

नवलपुरमा नारायणी तटीय क्षेत्रका सयौं घर डुबानमा

हेर्नेपाटी शनिबार, असोज १२, २०८१

कावासोती

लगातारको वर्षापछि नारायणी नदी बस्तीमा छिर्दा तटीय क्षेत्र डुवानमा परेको छ । नदीबाट यहाँका सयौं घर डुवानमा परेका छन् । मध्यविन्दु नगरपालिका वडा २ मा तीन सयभन्दा बढी घर डुबानमा परेको र थप बस्ती जोखिममा रहेको वडाध्यक्ष रामभक्त अधिकारीले जानकारी दिनुभयो ।

उहाँका अनुसार सितापुर, नन्दपुर, भुताहा, धजाहका तीन सयभन्दा बढी घर डुवानमा परेका छन् । यहाँ ७० जनालाई उद्दार गरेर सुरक्षित स्थानतर्फ सारिएको र उद्दार कार्य चलिरहेको प्रहरी चौकी कोल्हुवाले जनाएको छ ।

यस्तै, वर्षा रातिसम्म हुने हो भने यहाँको वस्ती टापुमा परिणत हुने अध्यक्ष अधिकारीले बताउनुभयो । यहाँका झण्डै ८० घर परिवार यसअघि नै विस्थापित भएका थिए ।

कावासोती –१५ बाघखोर र वडा १७ अमलटारीका ५० भन्दा बढी घर डुवानमा परेका प्रहरीले जनाएको छ । तलबाट नारायणी र माथिबाट केरुङ्गे खोला पसेपछि यहाँका वस्ती डुबानमा परेका हुन् ।

गैँडाकोटका चारवटा वडाका तीन सयभन्दा बढी डुवानमा परेका गैँडाकोट प्रहरीले जनाएको छ । गैँडाकोटका बोटे टोल, सुकुम्वासी टोल, गैरी सिकारी टोल, थुम्सी, पितौजी लगायतका क्षेत्र डुवानमा परेका हुन् ।

यसैगरी नवलपुरका सहायक प्रमुख जिल्ला अधिकारी मुक्तिराम रिजालका अनुसार गैँडाकोट नगरपालिका २ स्थित होटल रिभर क्राउन र नारायणी रिसोट तथा स्थानीयका घरमा फसेका ७७ जनालाई नेपाल प्रहरी, शसस्त्र प्रहरी र नेपाली सेनाको सयुक्त टोलीले उद्धार गरी सुरक्षित स्थानमा सारेको छ ।

अविरल वर्षापछिको खहरे खोलाले बुलिङटार गाउँपालिका –३ मा तीन घर बगाएको छ । क्षतिको विवरण प्राप्त भइसकेको छैन ।

साभार ः नवलपुर टाइम्स

प्रकाशित मिति: शनिबार, असोज १२, २०८१ १७:४६