काभा वुमन्स नेसन्स कपमा नेपालले आज भारतको सामना गर्दै

खेलकुद

गृहपृष्ठ
खेलकुद

काभा वुमन्स नेसन्स कपमा नेपालले आज भारतको सामना गर्दै

हेर्नेपाटी शनिबार, साउन १९, २०८१

काठमाडौं

घरेलु भूमिमा भइरहेको काभा वुमन्स भलिबल नेसन्स लिगमा नेपालले आफ्नो दोस्रो खेलमा आज भारतसँग प्रतिस्पर्धा गर्दैछ । खेल त्रिपुरेश्वरस्थि राखेपको कभर्डहलमा दिउँसो ३ बजे सुरु हुनेछ ।

नेपालले उद्घाटन खेलमा श्रीलंकालाई सोझो सेटमा पराजित गरेको थियो । उता भारतले लगातार दुई खेल जितिसकेको छ । पहिलो खेलमा इरानलाई ३-१ ले हराएको भारतले दोस्रो खेलमा माल्दिभ्सलाई सोझो सेटमा पराजित गरेको थियो । भारत लिग चरणमा आफ्नो तेस्रो खेल खेल्दैछ ।

भारत दुई खेलबाट ६ अंक जोडेर शीर्ष स्थानमा छ । एक खेलबाट ३ अंक जोडेको नेपाल दोस्रो स्थानमा छ ।

नेपाल र भारत महिला भलिबलमा चिरपरिचित प्रतिद्वन्द्वी हुन् । तर नेपालले अहिलेसम्म भारतलाई हराउन सकेको छैन । त्यसैले नेपाली टोली घरेलु कोर्टमा घरेलु समर्थकको साथमा भारतविरुद्ध ऐतिहासिक जित निकाल्ने लक्ष्यमा छ ।

पछिल्लोपटक नेपाल र भारतबीच गत वर्ष चीनको हान्झाउमा भएको १९औं एसियाडमा प्रतिस्पर्धा भएको थियो । जसमा राम्रो प्रदर्शन गरेपनि नेपाल भारतसँग ३-१ ले पराजित भएको थियो । यस्तै गत वर्ष नेपालमै भएको काभा वुमन्स च्यालेन्ज लिगमा नेपाल भारतसँग ३-१ कै सेटमा पराजित भएको थियो ।

सन् २०१९ मा काठमाडौंमा भएको १३औं सागमा नेपाल भारतसँग समूह चरण र फाइनलमा गरी दुई पटक पराजित भएको थियो ।

त्यतिबेला समूह चरणमा सोझो सेटमा पराजित भएको नेपालले फाइनलमा उत्कृष्ट प्रदर्शन गर्नका बावुजत पनि ३-२ को सेटमा पराजित भएको थियो ।

पछिल्लो पाँच वर्षमा नेपालले भारतसँग चारपटक खेलिसक्दा पनि अहिलेसम्म जित हात पार्न सकेको छैन ।

यसपटक नेपाली टोलीका जितका लागि भोक पनि छ र भारतलाई पहिलोपटक हराउँदै काभा नेसन्स लिगमा उपाधि दाबेदारी पनि पेश गर्न चाहन्छ ।

साभारःअनलाइनखबरबाट

प्रकाशित मिति: शनिबार, साउन १९, २०८१ १०:५१