लगातार दोस्रो जितको लक्ष्यमा जर्मनी

खेलकुद

गृहपृष्ठ
खेलकुद

लगातार दोस्रो जितको लक्ष्यमा जर्मनी

हेर्नेपाटी बुधबार, असार ५, २०८१

काठमाडौं

घरेलु मैदानमा भइरहेको युरो २०२४ मा जर्मनीले बुधबार हंगेरीसँग आफ्नो दोस्रो खेल खेल्दैछ ।

समूह ए मा रहेको जर्मनी लगातार दोस्रो जित निकाल्दै नकआउट चरणमा स्थान सुरक्षित गर्ने लक्ष्यमा छ ।

जर्मनी र हंगेरीबीचको खेल नेपाली समय अनुसार राति ९:४५ बजे स्टुटगार्ड एरेनामा हुनेछ ।

जर्मनीले पहिलो खेलमा स्कटल्याण्डलाई ५-१ ले पराजित गर्दै सानदार सुरुवात गरेको थियो । त्यही प्रदर्शनलाई निरन्तरता दिने योजनामा आयोजक जर्मनी छ ।

उता पहिलो खेलमा स्वीट्जरल्याण्डसँग २-१ ले पारजित भएको हंगेरी जर्मनीलाई स्तब्ध पार्दै पहिलो जित निकाल्ने योजनामा हुनेछ ।

जर्मनीका प्रशिक्षक जुलियन नागेल्सम्यानले हंगेरीविरुद्ध पनि पहिलो खेलको जस्तै प्रदर्शन गर्ने लक्ष्य हरेको बताएका छन् । उनले आफ्नो टोली तयार रहेको र मैदानमा त्यही अनुसारको प्रदर्शनको अपेक्षा रहेको बताए ।

उता हंगेरीका प्रशिक्षक मार्को रोसीले जर्मनी अहिले कठिन प्रतिस्पर्धी रहेको र हंगेरीभन्दा राम्रो टिम भएको बताएका छन् । रोसीले आफ्नो टिमले उत्कृष्ट प्रदर्शन दिने बताए ।

जर्मनी र हंगेरीबीच मुख्य प्रतियोगितामा खेल हुन लागेको यो चौथो पटक हो । यसअघि यी दुई टोली तीनपटक भिड्दा २० गोल भएको थियो । हरेक खेलमा ६.७ को औसतमा गोल भएको थियो । हरेक खेलमा हंगेरीले पहिले गोल गरेको थियो ।

जर्मनी पाँचौ पटक युरोको सुरुवाती दुवै खेल जित्ने लक्ष्यमा छ । यसअघि जर्मनीले १९७२, १९८०, १९९६ र २०१२ मा युरोको सुरुवाती दुवै खेल जितेको थियो ।

हंगेरीले २०१६ मा अष्ट्रियालाई २-० ले हराएयता युरोमा पछिल्लो ७ खेलमा जित हात पार्न सकेको छैन ।

साभार ः अनलाईनखबरबाट

प्रकाशित मिति: बुधबार, असार ५, २०८१ १२:२६