विश्वासको मत लिँदै गण्डकीका मुख्यमन्त्री पाण्डे

कास्की

गृहपृष्ठ
कास्की

विश्वासको मत लिँदै गण्डकीका मुख्यमन्त्री पाण्डे

हेर्नेपाटी सोमबार, जेठ २८, २०८१

पोखरा

गण्डकीका मुख्यमन्त्री सुरेन्द्रराज पाण्डेले आज विश्वासको मत लिँदैछन् । उनको विश्वासको मतका लागि दिउँसो ३ बजे प्रदेशसभा बैठक डाकिएको छ ।

संविधानको धारा १६८ (३) बमोजिम सबैभन्दा ठूलो दलको नेताका हैसियतमा मुख्यमन्त्री बनेका उनलाई विश्वासको मत हासिल गर्न ३१ प्रदेशसभा सदस्यको साथ चाहिन्छ । यद्यपि उनले बहुमत जुटाउन नसक्ने विपक्षीको दाबी छ ।

६० सदस्ययीय प्रदेशसभामा कांग्रेसका २७, नेकपा (एमाले)का २२, नेकपा (माओवादी केन्द्र)का सात (सभामुखबाहेक), राष्ट्रिय प्रजातन्त्र पार्टीका दुई र एक स्वतन्त्र प्रदेशसभा सदस्य छन् ।

पाण्डेसँग हाल कांग्रेसका २७ सांसद मात्र छन् । राप्रपा मत दिन सकारात्मक देखिएको छ ।

त्यस्तै स्वतन्त्र सांसद राजीव गुरुङ उर्फ दीपक मनाङे पनि काठमाडौँबाट पोखरा आइसकेका छन् । उनले बहुमत पुग्ने सुनिश्चितता भए विश्वासको मत दिने बताए ।

`अरू ३० सिट पुगे म मत दिन्छु,´ उनले भने । ३१ सिट पुर्‍याउन बाँकी हुने १ सिट पाण्डे विपक्षी गठबन्धनबाटै चोर्नुपर्छ । धेरैले नेसपा नेता तथा माओवादीका सांसद फणिन्द्र देवकोटाले फ्लोर क्रस गर्न सक्ने आशङ्का गरेका छन् ।

तर माओवादी चाहिँ फ्लोर क्रस नहुने दाबी गर्छ । त्यसो त देवकोटा आइतबार भएको संसदीय दलको बैठकमा पन सहभागी थिए ।`उहाँ बैठकमा आउनुभयो । आफ्ना कुरा राख्नुभयो,´माओवादी प्रमुख सचेतक कुसुम बुढाले भनिन्, `शङ्का गर्नुपर्ने ठाउँ छैन ।´

पाण्डेले विश्वासको मत दिन गण्डकी प्रदेशसभामा प्रमुख प्रतिपक्ष दल नेकपा (एमाले), प्रतिपक्षी माओवादी, राप्रपा, नेसपा र स्वतन्त्र सांसद राजीव गुरुङसँग आग्रह गरेका छन् । उनले आइतबार पत्र लेखेर मत दिन आग्रह गरेका हुन् । पाण्डेले बहुमत नपाए उपधारा (५) अनुसार सरकार बन्छ ।

साभार ः रातोपाटीबाट

प्रकाशित मिति: सोमबार, जेठ २८, २०८१ १०:१५