देवचुली
नेकपा एमाले देवचुली नगर कमिटीले पत्रकार सम्मेलन गर्दै लोगो सार्वजनिक गरेको छ।
ज्येष्ठ १९ गते शनिबारबाट सुरु हुने दोस्रो अधिवेशनका लागी तयार पारिएको लोगो आज शुक्रबार सार्वजनिक गरिएको हो।
नेकपा एमाले नगर कमिटी देवचुलीका अध्यक्ष कृष्ण बहादुर केसीको अध्यक्षतामा गरिएको पत्रकार सम्मेलनमा लोगो सार्वजनिक गर्दै यसको बारेमा जानकारी गराउँदै उपाध्यक्ष भिमलाल तिवारीले अधिवेशनको तयारीको सम्बन्धमा जानकारी गराएका थिए।
पत्रकार सम्मेलनमा उपस्थित भएका पत्रकारहरूले गरेका जिज्ञासा , सुझाव तथा प्रश्नको बारेमा कमिटीका अध्यक्ष , सचिव तथा उपाध्यक्षले प्रस्ट पारेका थिए। कार्यक्रममा लोगो सार्वजनिक गर्दै अध्यक्ष केसीले लोगोमा देवचुलीको पहिचान र विशिष्टता प्रतिबिम्बित गर्दै यो पूर्ण नभई प्रारम्भ र प्रतिनिधि सिम्बोल भएको बताएका थिए।
लोगोमा देवचुली डाँडा , नगरपालिकाको नक्सा , होमस्टेको सिम्बोल , कुडूलेघर , शास्वत्धाम , मन्दिर , घुमौरी पिकनिक स्पट , एकसिँगे गैंडा र केही समथर भूभागको तस्बिर राखिएको छ।
कार्यक्रममा उपाध्यक्ष तिवारीले नगर कमिटीले यस अघि २०७८ कार्तिक ९ गते प्रथम अधिवेशन सफलतापूर्वक सम्पन्न गरेको र दोस्रो अधिवेशनको तयारी जोडतोडले गरेको बताएका थिए। तिवारीका अनुसार दोस्रो अधिवेशनलाई नेकपा एमालेको केन्द्रिय कमिटी पोलिटब्युरो सदस्य तथा नवलपुर इन्चार्ज मना केसी जिसीले उद्घाटन गर्ने कार्यक्रम तय भएको छ।
यसै क्रममा अधिवेशनको लागी विभिन्न कमिटी बनाएर कमिटी संयोजकको जिम्मेवारी प्रदान गरिएको छ। कृष्ण बहादुर केसीको संयोजकत्वमा प्रतिवेदन तयारी कमिटी र प्रचार प्रसार कमिटी , भिमलाल तिवारीको संयोजकत्वमा प्रतिनिधि व्यवस्थापन कमिटी , डिलाराम पाण्डेको संयोजकत्वमा आर्थिक व्यवस्थापन कमिटी , ओम प्रकाश तिवारीको संयोजकत्वमा मञ्च व्यवस्थापन कमिटी , भुपाल अधिकारीको संयोजकत्वमा जलपान कमिटी तथा चन्द्र बहादुर थापाको संयोजकत्वमा स्वयम् सेवक परिचालन कमिटी गठन गरिएको छ।
