पशुपतिमा बाजा बजाउने कर्मचारी प्रयोग गरेर दैनिक २० हजारसम्म चोरी

देश

गृहपृष्ठ
देश

पशुपतिमा बाजा बजाउने कर्मचारी प्रयोग गरेर दैनिक २० हजारसम्म चोरी

हेर्नेपाटी बुधबार, जेठ ९, २०८१

काठमाडौँ

पशुपतिनाथ मन्दिरको भेटी चोरेको आरोपमा पक्राउ परेका ५ जनामाथि प्रहरीले अनुसन्धान अघि बढाएको छ । प्रहरी वृत्त गौशालाको हिरासतमा रहेका पशुपति क्षेत्र विकाश कोषका ५ जना कर्मचारीमाथि प्रहरीले अनुसन्धान गरिरहेको हो ।

प्रहरीका अनुसार पक्राउ परेकामध्ये ३६ वर्षीय नवराज घिमिरे र ५१ वर्षीय नवराज ढोडारी पशुपतिको मन्दिरमा चढाएको भेटी गन्ने जिम्मेवारी लिएका कर्मचारी हुन् ।

यस्तै २९ वर्षीय सञ्जय कपाली, ३५ वर्षीय कुमार दमाई परियार र ३४ वर्षीय अनिल परियार चाहिँ बाजा बजाउने कर्मचारी हुन् । पशुपतिको नित्य पूजा गर्नेबेला कपालीले नेवारी संस्कृति अनुसारको बाजा र परियारद्वयले सनाई बजाउँछन् ।

तर, उनीहरूलाई पछिल्लो समय भेटी गन्नेहरूले सहयोगी बनाएको भेटिएको छ । भेटी गन्ने मुख्य जिम्मेवारीमा रहेका घिमिरे र ढोडारीसँगै उनीहरू पनि गणना गर्ने ठाउँमा जान्थे । सो कोठामा प्रवेश गर्दा र फर्किँदा सशस्त्र र नेपाल प्रहरीले सुरक्षा जाँच गर्छ । तर, उनीहरूले भित्रबाट ज्याकेटको बाहुलामा लुकाएर रकम ल्याउने गरेको प्रहरीको अनुसन्धान निष्कर्ष छ ।

अनुसन्धानमा संलग्न एक जना अधिकृतका अनुसार पैसा गणना गर्ने टेबलमा सँगै बसेर गन्दा हजार र पाँच सयका नोट ढोडारी र घिमिरेले बाजा बजाउने कर्मचारीहरूतर्फ फाल्छन् । त्यसरी फालेको रकम पैसा गनेको जस्तो गरेर बाजा बजाउनेहरूले पाखुराबाट भित्र लुकाएर बाहिर निस्कन्छन् । अनुसन्धानमा संलग्न एक अधिकृत भन्छन्, ‘बाहिर आएपछि ढोडारी र घिमिरेलाई फिर्ता दिने गरेको प्रारम्भिक अनुसन्धानबाट थाहा भएको छ ।’

भित्रबाट पैसा चोरेर बाहिरसम्म ल्याइदिएबापत बाजा बजाउनेहरूले प्रतिव्यक्ति दैनिक १ हजारदेखि १५ सय कमिसन पाउने गरेको प्रहरीसँग बताएका छन् । अनुसन्धानमा संलग्न एक जना अधिकृतले भने, ‘आरोपीहरूले दैनिक १५ देखि २० हजारसम्म चोरेको देखिन्छ ।’

बाजा बजाउनेहरूले मासिक २७ हजार तलब लिन्छन् । नित्य पूजा गर्ने बेला बाजा बजाएपछि अरू काम नहुने हुनाले कोषका पदाधिकारीसँग अनुमति लिएर ढोडारी र घिमिरेले उनीहरुलाई पैसा गन्ने कोठामा लान थालेका हुन् । आरोपीहरुबिरुद्ध आपराधिक विश्वासघात र चोरी मुद्दामा अदालतबाट ५ दिनको म्याद लिएर अनुसन्धान भइरहेको जिल्ला प्रहरी परिसर काठमाडौँका सूचना अधिकारी (एसपी) नवराज अधिकारीले रातोपाटीलाई बताए ।

नेतृत्वकर्ता ढोडारी, दैनिक ४ लाख सङ्कलन

भेटी गणना गर्ने टिमको नेतृत्वकर्ता ढोडारी हुन् । भेटी गणना गरेपछि इन्भेस्टमेन्ट मेगा बैंकका कर्मचारीहरू रकम लिन पशुपतिमा नै जाने गर्छन् । ढोडारी नेतृत्वको टिमले कुच्चिएका नोट मिलाएर गनेपछि मेशिनमार्फत रुजु गरेर ट्याग लगाएर बैंकका कर्मचारीहरूले लिएर फर्किन्छन् । पशुपतिनाथबाट दैनिक ४ लाख भेटी रकम बैंकमा डिपोजिट हुन्छ ।

चोरी आरोपमा थुनामा रहेका ढोडारीले भने प्रहरीसँग इन्कारी बयान दिएका छन् ।

साभारःरातोपाटीबाट

प्रकाशित मिति: बुधबार, जेठ ९, २०८१ १६:३७