काठमाडौं
पाकिस्तान र अफगानिस्तानमा सक्रिय आतंकवादी संगठन आईएस खोरसानले टी-२० वर्ल्ड कप क्रिकेटमा आक्रमण गर्ने धम्की दिएको मिडिया रिपोर्ट सार्वजनिक भएको छ ।
आयोजक वेष्ट इण्डिज क्रिकेटका अधिकारीले सुरक्षा अधिकारीहरुसँग मिलेर आवश्यक प्रबन्धका लागि काम गरिरहेको बताएका छन् ।
अन्तर्राष्ट्रिय मिडियाहरुका अनुसार आतंकवादी संगठनले वेष्टइण्डिज सहितका देशहरुलाई भिडियो म्यासेज पठाएर आक्रमणको धम्की दिइएको छ ।
आईएस खोरसानको अफगानिस्तान-पाकिस्तान शाखाले नशीर-ए-पाकिस्तान च्यानलमार्फत् पनि एक भिडियो सार्वजनिक गर्दै हमलाको धम्की दिएको अन्तर्राष्ट्रिय सञ्चार माध्यमहरुले उल्लेख गरेका छन् । नशीर-ए-पाकिस्तान इस्लामिक स्टेटसँग सम्बन्धित प्रोपोगाण्डा च्यानल हो ।
क्रिकेट वेष्टइण्डिजका सीईओले भने-सुरक्षा पहिलो प्राथमिकता
क्रिकेट वेष्टइण्डिजका सीईओ जोनी ग्रेब्सले क्रिक बजसँगको कुराकानीमा आयोजक देश र प्रतियोगिता हुने शहरहरुमा लगातार निगरानी गर्न र सम्भावित खतराको सामना गर्न अधिकारीहरुसँग मिलेर काम गरिरहेको बताएका छन् । सुरक्षा आफूहरुको पहिलो प्राथमिकता रहेको भन्दै उनले आवश्यक प्रबन्ध मिलाइने बताएका छन् ।
टी-२० वर्लडकपका खेल वेष्टइण्डिज र अमेरिकामा जुन २ देखि २९ सम्म हुँदैछ । नेपाल पनि वर्ल्डकपमा सहभागी हुँदैछ । वर्ल्ड कप खेल्न नेपाली टोली वेष्टइण्डिज पुगिसकेको छ ।
टी-२० विश्वकपमा नेपाल रहेको समूह ‘डी’ मा दक्षिण अफ्रिका, बंगलादेश, श्रीलंका र नेदरल्यान्ड्स छन् । नेपालले पहिलो खेल ४ जुनमा नेदरल्यान्ड्ससँग खेल्ने छ । नेपालले १२ जुनमा श्रीलंकासँग, १५ जुनमा दक्षिण अफ्रिकासँग र १७ जुनमा बंगलादेशसँग खेल्ने छ । शीर्ष दुईमा रहन सके नेपालले सुपर ८ मा स्थान बनाउने छ ।
पारस भन्छन् - थाहा छैन
क्रिकेट एशोसिएसन अफ नेपाल (क्यान) का सचिव पारस खड्काले भने यसबारे आफूहरुलाई जानकारी नभएको बताएका छन् । अनलाइनखबरलाई संक्षिप्त प्रतिक्रिया दिँदै पारसले भने, ‘यसबारे मलाई थाहा छैन ।’
टी-२० वर्ल्ड कप २०२४ मा ग्रुप, नकआउट र फाइनल गरी कुल ५५ खेल हुने छन् । ३९ म्याच वेष्टइण्डिजमा र १६ खेल अमेरिकामा हुनेछन् ।
मिडिया रिपोर्ट अनुसार अमेरिकालाई भने धम्की आएको जानकारी छैन ।
साभार ः अनलाईनखबरबाट
