रास्वपाले ‘काठमाडौँको आँखामा कर्णाली’ मन्थन गर्दै

राजनिति

गृहपृष्ठ
राजनिति

रास्वपाले ‘काठमाडौँको आँखामा कर्णाली’ मन्थन गर्दै

हेर्नेपाटी सोमबार, चैत १२, २०८०

काठमाडौँ

राष्ट्रिय स्वतन्त्र पार्टी (रास्वपा) ले ‘काठमाडौँको आँखामा कर्णाली’ मन्थन गर्ने भएको छ । बुधबार विहान १० बजे नेपाल पर्यटन बोर्डमा ‘काठमाडौँको आँखामा कर्णाली’ मन्थन हुने भएको हो ।

कर्णालीका मुद्दाबारे स्थानीयदेखि राष्ट्रियस्तरसम्म सार्थक बहसको उद्देश्यमा तीन महिने अभियानको पहिलो बिन्दुका रूपमा उक्त कार्यक्रम गर्न लागिएको रास्वपाले जनाएको छ ।

मन्थनमा प्रत्यक्ष सहभागी हुन चाहनेहरुले फर्म भर्नुपर्ने छ । रास्वपा सचिवालय बैठकले फागुन ६ गते कर्णालीका वडादेखि प्रदेशस्तरीय समिति र विभाग विघठन गरी तीन महिने ‘कर्णाली विशेष अभियान’ सञ्चालन गर्ने निर्णय गरेको थियो। उक्त अभियानका लागि सहमहामन्त्री विपिन आचार्यको नेतृत्वमा संयोजन समिति बनेको छ ।

आचार्य नेतृत्वको समितिमा कोषाध्यक्ष निमा अधिकारी, केन्द्रीय सदस्य तथा सांसद बिनिता कठायत र केन्द्रीय संगठन विभागका सचिव शंकर श्रेष्ठ सदस्य छन् । संयोजन समितिलाई कर्णालीका पार्टी संरचना विघटन गर्नुका मुख्य-मुख्य कारण पहिल्याने जिम्मेवारी छ ।

साथै आचार्य नेतृत्वको समितिले नयाँ शिराबाट सदस्यता विस्तार, संरचना गठन र विधिपूर्वक सञ्चालनको नीति, योजना र कार्यक्रम बनाएर कार्यान्वयनमा सहजीकरण गर्ने रास्वपाले जनाएको छ ।

समितिले स्थानीय सरकार, प्रशासन र समुदायबाट प्राप्त हुने सुझावका आधारमा कर्णालीका मुख्य मुद्दा-समस्याबारे बहस र पैरवीसहित समाधानमा अर्थपूर्ण खबरदारीको अगुवाई पनि गर्ने रास्वपा महामन्त्री मुकुल ढकालले बताए ।

रास्वपाले पार्टी गठन र विस्तारसहित कर्णालीका मुद्दाबारे स्थानीयदेखि राष्ट्रियस्तरसम्म सार्थक बहसको उद्देश्यमा तीन महिने अभियान सञ्चालन गर्न लागेको उनको भनाइ छ ।

साभारःरातोपाटीबाट

प्रकाशित मिति: सोमबार, चैत १२, २०८० १२:३४