देवचुली
नेपाली काँग्रेस देवचुली नगरपालिकाको नगर सम्मेलन आज बिहीबार सम्पन्न भएको छ। नेपाली काँग्रेस देवचुलीका सभापति डिल्लीराम कडरियाको अध्यक्षता सँगै नेपाली कांग्रेसका पूर्व केन्द्रिय सदस्य गुरुराज घिमिरेको प्रमुख आतिथ्यमा कार्यक्रम सम्पन्न भएको हो।
कार्यक्रममा देवचुली नगर भित्रका १७ वटा वडाबाट नेता तथा कार्यकर्ताको उपस्थिति रहेको थियो। सोही अवसरमा उपस्थित कार्यकर्ताहरूले आफ्ना नेताहरूलाई विभिन्न जिज्ञासाहरू राखेका थिए भने नेताहरूले पनि प्रत्येक जिज्ञासाको जवाफ दिनुभएको थियो।
कार्यक्रममा बोल्दै प्रमुख अतिथि घिमिरेले पार्टी व्यक्ति विशेष नभई सबै सदस्यको साझा संस्था भएकाले एकअर्काको विचार, भावना र योग्यतालाई सुनेर र बुझेर पार्टी चल्नुपर्ने बताउनुभएको थियो।
आजको सम्मेलनमा कृषि तथा भूमि व्यवस्थापन मन्त्रालय गण्डकी प्रदेशका मन्त्री एवम् नेपाली काँग्रेस नवलपुरका जिल्ला सभापति महेन्द्रध्वज जिसी , नेपाली कांग्रेसका जिल्ला प्रतिनिधि तथा महासमिति सदस्य विष्णुदेवी पाण्डे , नगर समितिका उप सभापति हरिभक्त भट्टराई , सबै वडाका सभापति सँगै कार्यकर्ताहरूको उपस्थिति रहेको थियो।
कार्यक्रममा बोल्दै नेपाली कांग्रेस देवचुलीका सभापति तथा कार्यक्रमका अध्यक्ष कडरियाले यस सम्मेलनले सम्पूर्ण नेता तथा कार्यकर्ताहरूमा थप उत्साह, जोस र जाँगर थपिएको बताउनुभएको थियो।
कार्यक्रमको समापन नेपाली कांग्रेस देवचुलीका उप सभापति भोजेन्द्र रायमाझीले गर्नुभएको थियो।
