टिकटक र सेल्फीका लागि तीन कन्या पार्क !

देवचुली

गृहपृष्ठ
देवचुली

टिकटक र सेल्फीका लागि तीन कन्या पार्क !

एलिना केसी आइतबार, साउन ७, २०८०

देवचुली,

पछिल्लो समय टिकटक नबनाउने सायदै कोही होलान । टिकटकका लागि चाहिने मनमोहक दृश्य र मनै लोभ्याउने वातावरण तपाईलाई पर्खिरहेको छ । तपाईको मोबाइल र क्यामराको लेन्समा यि सुन्दर दृश्यहरु कैद गर्नका लागि तपाई तीन कन्या पार्कसम्म पुग्नुपर्ने हुन्छ ।
कहाँ छ त तीन कन्या पार्क ?

नवलपुर जिल्लाको देवचुली नगरपालिका वडा नं ७ र ८ मा रहेको तीन कन्या पार्क पुग्न दलदले बजारबाट करिब ४ किलोमिटर उत्तरतर्फ वडाकार्यालय चोक पुगेपछि त्यहाँबाट ३ सय मिटर पूर्वमा रामबास चोक पुगिन्छ । रामबास चोकबाट सिधै उत्तरतर्फ ६ सय मिटरमा सुन्दर सल्लाका बोटहरुसँगै तीन कन्या पार्कले तपाईलाई स्वागत गरि बसेको छ । तीन कन्या पार्क पुग्ने वित्तिकै हात्तीको मुखबाट झरझर झरिरहेको झरना देख्न सकिन्छ । झरनालाई दाहिने पारेर सल्लाका बोटहरु माझबाट केही खुड्किला भ¥याङ उक्लेपछि भ्युटावर पुगिन्छ । भ्युटावरको मुन्तिर दाहिने पट्टि सातै प्रदेश समेटिएको नेपालको विशाल नक्शा अवस्थित छ । सल्लाघारीका बिचबिचमा प्रेमील बात मार्नका लागि सुस्ताउने सिमेन्ट कुर्सीहरु राखिएको छ । सँगै छ पिङ पनि । सल्लाका बोटमा राती पनि सुन्दर देखिनका लागि बत्तीहरु जडान गरिएको छ । पानपाते आकारमा सेल्फी जोन पनि राखिएको छ । तीन कन्या माईको मन्दिरमा पूजा आराधना पनि गर्न सकिन्छ । समग्रमा तीन कन्या पार्कमा तपाईलाई केही घण्टा प्रकृति मै हराएर सुन्दर दृश्यहरु कैद गर्न काफी हुनेछ ।कार्यक्रमको आयोजना गरि पार्क उद्घाटन एवम् वृक्षारोपण
आइतबार तीन कन्या माई बहुधार्मिक पर्यटकीय साँस्कृतिक व्यवस्थापन संरक्षण संस्थाको आयोजनामा पार्कको समुद्घाटन एवम् वृक्षारोपण गरिएको छ । संस्थाका अध्यक्ष बेलिमाया पुलामीको अध्यक्षता एवम् गण्डकी प्रदेशका पूर्व सांसद ओमकला गौतमको प्रमुख आतिथ्यतामा पार्कको समुद्घाटन एवम् वृक्षारोपण गरिएको हो । कार्यक्रममा बोल्दै प्रमुख अतिथी रहनुभएकी पूर्व सांसद गौतमले यस देवचुली नगरपालिकाको धार्मिक र पर्यटकीय क्षेत्रमा यस पार्कले यहाँको समुदायमा आम्दानीको श्रोत बन्न सक्ने अपेक्षा गरिएको बताउनुभयो । उहाँले आफ्नो कार्यकालमा यस क्षेत्रमको विकासका लागि केही भएपनि सहयोग गर्न पाएकोमा खुशी व्यक्त गर्दै यहाँको भविष्य राम्रो रहेको बताउनुभएको थियो । आगामी दिनमा पनि तीन कन्या पार्कको स्तरोन्तीका लागि आँफू सधै साथ रहेको समेत बताउनुभयो ।
कार्यक्रममा नेपाल सरकारका उपसचिव एवम् देवचुली नगरपालिकाका पूर्व प्रमुख प्रशासकीय अधिकृत विष्णु प्रसाद भुसालले तीन कन्या पार्कलाई सुन्दर बनाउन महत्वपूर्ण भूमिका खेल्ने सम्पूर्णलाई धन्यवाद दिँदै पर्यटकीय गन्तव्यका रुपमा एकदिन यस पार्क चुनिने बताउनुभएको थियो । यहाँ अझै थुप्रै कार्य गर्नुपर्ने देखिएकाले यसको विकासका लागि स्थानीय सरकारले चासो देखाउनुपर्ने बताउनुभयो । पार्क समुद्घाटन कार्यक्रममा प्रमुख अतिथी एवम् विशिष्ट अतिथीहरुले पार्कमा धुपि समेत रोपेका थिए । कार्यक्रममा विभिन्न संघसंस्थाका व्यक्ति, स्थानीय आमासमूह, विभिन्न राजनीतिक दलका व्यक्ति, सामुदायिक वनका प्रतिनिधि लगायत स्थानीय बुद्धिजिविहरुको उपस्थिति रहेको थियो ।