प्रिय,
समय छैन सोझो
बाटो छैन सोझो
चाहना छैन सोझो
र
स्वार्थ छैन सोझो !
मलाई यत्ति थाहा छ,
तिमीलाई बाङगो देख्न
मैले आफ्नै आँखा बङग्याउनु पर्छ,
बङग्याउनु पर्छ मेरो सपाट दृष्टि !
तिमीलाई बाङगो भन्न
मैले आफ्नै मुख बङग्याउनु पर्छ,
बङग्याउनु पर्छ मेरो अन्तरको आवाज !
मेरो सिधा दृष्टि
र
सोझो आवाज संग
मलाई प्रेम भए जस्तै
तिम्रो स्वभाविक भ्रम संग पनि मलाई उत्तिकै प्रेम छ !
समय बाँगो भएको बेला
प्रेम भ्रम र भ्रम प्रेम हुनु अनौठो हैन !
तिमीलाई पनि त
कहलिन मन लाग्दो हो-
म फलानोको मान्छे
म उड्ने आकास यो
म रम्ने परिवेश यो !
तिमीलाई पनि त लाग्दो हो
भोलीका अफ्टेराहरू संग डर !
अनि हुँदो हो
आजका सहजताहरू संग प्यार !
गोठ छोडेको प्राणी
सबै भन्दा फुर्तीले उफ्रिए जस्तै,
घर छोडेको सन्तान
अहंकारले डुक्रिए जस्तै
तिमीलाई पनि त उफ्रिनु छ होला
केही स्वतन्त्रताहरू संगै !
बहकिनु छ होला
केही स्वच्छन्दताहरू संगै !
उडी जाने सबै चरी चारो टिपेर
कहाँ फर्कन्छन र गुँडमा ?
स्वभाव हो प्राणीको,
हरियोले तानिनु !
आदत हो मानिसको,
मायाले मन भरिनु !
मलाई विश्वास छ-
उड्ने बादलहरूले पनि
एकदिन पानी पार्नेछन !
प्रिय,
चाहारेर सके पछि रहरका सबै बजार
अन्तिममा पुग्नू खेलौना बजारमा,
त्याहाँ हरेक प्रकारका खेलौना भेटिनेछन !
-आमा जस्तो खेलौना
-बा जस्तो खेलौना
-प्रियतम जस्तो खेलौना
-प्रियतमा जस्तो खेलौना
-दाजु भाई जस्तो खेलौना
-दिदी बैनी जस्तो खेलौना
-सन्तान जस्ता खेलौना
-आफ्ना आफन्त जस्ता खेलौना
र
-साथी संगी जस्ता खेलौना !
कानमा गएर फुस्फुसाउनु सबको
र सोध्नु
सम्बन्ध के हो ?
जवाफ दिएछन भने कसैले,
मलाई सम्झिनू !
मौन बसेछन भने खेलौनाहरू,
हेर्नू ऐनामा एकपटक
र
आफैलाई सम्झाउनू !
प्रिय,
खेलौनाहरूको बजारमा
केही खेलौनाहरूलाई बोल्ने बनाइएको हुन्छ
केहीलाई मौन राखिएको हुन्छ !!
हेमन्त गिरी, जापान
