साङ्गीतिक प्रस्तुतिका लागि पोखरा आइपुग्यो नेपथ्य समूह

मनोरन्जन

गृहपृष्ठ
मनोरन्जन

साङ्गीतिक प्रस्तुतिका लागि पोखरा आइपुग्यो नेपथ्य समूह

हेर्नेपाटी सोमबार, पुस ११, २०७९

मंगलबार हुन लागेको साङ्गीतिक प्रस्तुतिका लागि नेपथ्य समूह पोखरा आइपुगेको छ ।

अमृत गुरुङलगायत मञ्चमा उपस्थित हुने छ जना कलाकार साथै प्राविधिक र व्यवस्थापनसहित ७० जनाको विशाल नेपथ्य टोली आइतबार बेलुकी पोखरा आइपुगेको हो । पाँचवटा ट्रक र दुईवटा बसहरुमा आइपुगेको यो टोलीलाई आइतबारै पोखराका मेयर धनराज आचार्यले स्वागत तथा सम्मान गरेका थिए । त्यस अवसरमा मानवसेवा आश्रमका प्रमुख रामजी अधिकारीलगायत पदाधिकारीहरुको उपस्थिति रहेको थियो ।

यसपटकको देश दौडाहामा नेपथ्यले बिराटनगर, वीरगन्ज, हेटौंडा, चितवन, नेपालगंज, धनगढी, वीरेन्द्रनगर सुर्खेत र बुटवलमा भव्य कन्सर्ट प्रस्तुत गरिसकेको छ । पोखराबाटै उदाएको नेपथ्य ब्याण्ड नेपाल र विश्वभरि छरिएका नेपाली युवापुस्तामाझ लोकप्रिय लोक रक संगीत टोली हो । यसपटकको महिनादिन लामो नेपाल भ्रमण अन्तर्गत गृहशहर पोखरामा नवौँ प्रस्तुति दिन लागेको हो ।

कार्यक्रम पुस १२ गते मंगलबार बेलुकी ४ बजे स्थानीय नयाँबजारस्थित ‘प्रदर्शनी केन्द्र’मा हुनेछ । पोखरामा यसअघि नेपथ्यले संस्थागत रुपमै आठपटक आफूलाई प्रस्तुत गरिसकेको छ । राजधानी काठमाडौं उपत्यकापछि सबैभन्दा बढी ब्याण्डले आफूलाई पोखराको भूमिमै उभ्याएको छ ।

ब्याण्डले यसअघि ‘शान्तिको लागि शिक्षा’ अभियान बोकेर पाँच पटक आफूलाई यहाँ प्रस्तुत गरेको छ भने यसपटक नयाँ अभियान ‘मानवताको लागि संगीत’ अन्तर्गत यो पहिलो कन्सर्ट हुनेछ । संगीतका साथसाथै मानवताको उद्देश्यसहित मानवसेवा आश्रमको आयोजनामा यसपटक नेपथ्यले मुलुकभरको यात्रा गर्दै हिँडेको हो । यस क्रममा ब्याण्डले नेपालको पुर्वदेखि पश्चिमसम्म गरेर दस स्थानमा कन्सर्ट आयोजना गर्नेछ ।

मंगलबारको प्रस्तुतीका लागि प्रदर्शनी केन्द्र मैदानमा मञ्च बनाउने काम धमाधम सुरु भइसकेको छ । सोमबार बेलुकी त्यहाँ आवाज तथा प्रकाश इत्यादिको परिक्षण गरिने जनाइएको छ । मञ्च तथा प्रविधिका हिसाबले यो प्रस्तुति अहिले विश्वभर प्रचलित आधुनिक रक कन्सर्टको अवधारणालाई पालना गरेको कार्यक्रम हुने पनि ब्याण्डले जनाएको छ । उक्त स्तरलाई कायम गर्नकै निम्ति कलाकारबाहेक पनि ठूलो संख्यामा प्राविधिक तथा व्यवस्थापन टोलीले साथमा यात्रा गर्नुपरेको ब्याण्डको भनाई छ । यस

कन्सर्टको लाभांसले मानवता प्रबर्द्धनका साथै पोखरामा आश्रमको आफ्नै शाखा भवन बनाउने उद्देश्य लिइएको छ । त्यसैगरि कार्यक्रमको आम्दानीबाट बेसहाराहरुको खाना, नाना र छानाका निम्ति अक्षयकोषको पनि स्थापना गरिनेछ ।

प्रकाशित मिति: सोमबार, पुस ११, २०७९ १५:३०