राप्रपामा समानुपातिकतर्फ दोश्रो पुरुष कसलाई सांसद बनाउने भन्ने विवाद

राजनिति

गृहपृष्ठ
राजनिति

राप्रपामा समानुपातिकतर्फ दोश्रो पुरुष कसलाई सांसद बनाउने भन्ने विवाद

हेर्नेपाटी शुक्रबार, मंसिर २३, २०७९

राष्ट्रिय प्रजातन्त्र पार्टीको समानुपातिकबाट प्रतिनिधि सभामा दोश्रो पुरुष कसलाई पठाउने भन्नेमा विवाद भएको छ ।प्रत्यक्षमा ७ सिट जितेको राप्रपाले समानुपातिकमा पनि ७ सिट नै पाएको छ । समानुपातिकको ७ मध्ये उसले ५ जना महिला र दुई जना पुरुष पठाउनु पर्ने छ ।

समानुपातिकतर्फ खर्स आर्यको पहिलो नम्बरमा रहेका पशुपति शमशेर राणालाई सांसद बनाउने विषयमा कुनै विवाद नभए पनि दोश्रो पुरुषका बारेमा विवाद भएको राप्रपा निकट श्रोतले जनाएको छ ।

आदिवासी जनजातिको पहिलो नम्बरमा रहेका बुद्धीमान तामाङ, मधेसीको पहिलो नम्बरमा रहेका प्रल्हाद साह र खस आर्यतर्फ दोश्रो नम्बरमा रहेका प्रकाशचन्द्र लोहनी मध्ये एक जना छान्न राप्रपा अध्यक्ष राजेन्द्र लिङ्देनलाई समस्या परेको छ ।

पुरुषतर्फ सांसद हुनेको नाम नटुंगिएकाले ५ जना महिलातर्फ पनि कसलाई पठाउने भन्ने टुंगो लागेको छैन ।

लोहनीलाई लैजाँदा महिला खस आर्यको पहिलो नम्बरमा रहेकी रोशन कार्की सांसद हुन पाउँदिनन् ।

यस्तै तामाङलाई लगेमा आदिवासी महिलातर्फ पहिलो नम्बरमा रहेकी बिना लामाको नाम काटिने छ । रुबीभ्यालीकी पूर्वउपाध्यक्ष रहेकी लामा क्रिस्चियन भएकाले हिन्दु राष्ट्रको वकालत गर्ने पार्टीले उनलाई पठाउन हुन्न भन्ने मत राप्रपाभित्र रहेको श्रोतको भनाइ छ ।

समानुपातिकमा मधेसबाट राम्रो मत आएकोले साहलाई लैजाने दबाव पनि अध्यक्ष लिङदेनमाथि छ ।

बागमती प्रदेशको समानुपातिकमा पनि विवाद रहेको श्रोतले जनाएको छ । राप्रपाले बागमती प्रदेशमा १ जना पुरुषलाई पठाउन पाउँछ । जसमा महामन्त्री भुवन पाठक र नेता दिलविकास राजभण्डारी मध्ये कसलाई पठाउने भन्ने विवाद रहेको हो ।

पार्टीले प्रतनिधि सभामा पठाउने समानुपातिक सांसदको नाम तय गर्न भोलि शनिबार कार्य सम्पादन समितिको बैठक समेत बोलाएको छ ।

प्रकाशित मिति: शुक्रबार, मंसिर २३, २०७९ १७:३८